Sawa, nahugot mula sa loob ng ide-deliver na parcel

Isang maliit na sawa ang nakita sa loob ng isang parcel na ide-deliver ng rider sa Taguig.

Sa ulat ng GTV News Balitanghali nitong Martes, makikitang binubuksan ng delivery rider ang parcel na ihahatid sana sa Taguig ng kaibigan niyang rider din.

May makita raw kasing buntot sa parcel kaya niya ito binuksan. Hindi nagtagal, nailabas mula sa parcel ang isang maliit na sawa.

Inilagay daw ng rider ang ahas sa galon, at saka pinakawalan sa malayong lugar na walang tao.

Hinala ng rider, posibleng nakapasok lang sa parcel ang ahas at hindi kasama sa package na ipapadala. – FRJ, GMA News