Ilang beses mang nadapa ngayong pandemya, patuloy namang bumabangon ang 'Eat Bulaga' Dabarkad na si Allan K.
Noong nakaraang taon, sa kasagsagan ng Covid-19 pandemic, dinapuan ang virus ang komedyante. Na-admit siya sa intensive care unit ng isang ospital nang tatlong araw dahil sa severe case ng Covid. Sa kabutihang palad, na-survive niya ang highly contagious virus.
Bago iyon, mas may matinding pinagdaanan si Allan--ang pagkamatay ng kanyang dalawang kapatid na sina Junjun at Melba Quilantang.
Hindi lang mga mahal sa buhay ni Allan ang nawala sa kanya, kundi rin ang mga negosyo niyang comedy bars na Klownz at Zirkoh na halos dalawang dekada niyang pinatakbo.
Nagdesisyon si Allan K. na magdeklara ng bankruptcy at isara ang kanyang comedy bars dahil sa kawalan ng kita sanhi ng pandemya at sa patuloy na pagtaas ng mga kaso ng Covid-19 sa bansa.
Sa kabila ng mga dagok na dumating sa buhay ni Allan, bagong pag-asa ang bumungad sa kanya matapos ang hindi magagandang nangyari sa kanya noong nakaraang taon.
Matapos lumipat sa bagong bahay sa Quezon City, bumalik na rin siya sa pagnenegosyo.
Binuksan niya ang kanyang Japanese restaurant na tinawag niyang Koban na nasa Tomas Morato Avenue sa Quezon City.
Malapit na ring magbukas ang isa pang negosyo ni Allan K. na isang restobar na pinangalanan niyang Zirkulo na matatagpuan naman sa Las Piñas City.
Silipin ang mga bagong negosyo ng "Pambansang Ilong ng Pilipinas" sa gallery na ito:
Proud na proud si Allan K. na ishinare sa kanyang Instagram account ang kanyang bagong negosyo na Japanese restaurant na tinawag niyang Koban.
Ipinagmamalaki ni Allan K. na nagse-serve sila ng authentic Japanese food sa kanyang bagong resto gaya ng ramen, sashimi, sushi, at bento boxes.
Nakatanggap naman ng suporta si Allan K. mula sa kanyang mga kaibigan at kasamahan sa industriya. Ilan lamang sa mga bumisita sa kanyang Japanese restaurant ang mga Kapuso stars na sina EA Guzman at Shaira Diaz.
Favorite reunion spot din ito ng mga nakasama ni Allan K. sa Klownz at Zirkoh tulad ng stand-up comedians na sina Boobay at Boobsie.
Maging si John Lloyd Cruz ay nagpaabot ng suporta kay Allan K. sa pamamagitan ng pag-dine in sa restaurant.
Ang dating executive ng TAPE at 'Eat Bulaga!' na si Malou Choa-Fagar at talent manager na si Bernard Cloma ay malugod ding winelcome ni Allan K. sa Koban.
Entertainer sa Japan si Allan K. bago siya pumasok sa showbiz noon kaya malapit sa kanyang puso ang nasabing bansa.
Madarama ang "Japan feels" sa loob ng restaurant dahil sa interior design nito.
Sa larawang ito, makikitang si Allan K. mismo ang nagpipinta ng Mt. Fuji temple sa isang pader ng restaurant.
Noong August 24, 2021, masayang ibinahagi ni Allan K. ang kanyang newest business--ang Zirkulo restobar--na located sa BF Resort Village sa Las Piñas City.
Gaya ng Klownz at Zirkoh, makulay at masaya ang dating ng restobar. Ang kaibahan lang, ito ay al fresco at maraming halaman na nakapalibot dito na perfect dining space ngayong panahon ng pandemya.
May ilan pang kailangang gawin sa bagong restobar ni Allan K. pero makikita na buo na ang konstruksyon nito.
May pagka-romantic din ang vibe ng restobar na perfect sa mga makikipag-date.
Ayon kay Allan K., handa na silang mag-operate ngunit na-postpone ito dahil sa umiiral na community quarantine sa NCR.