READ: Lolit Solis, ibinuking sa throwback photo ang secret date nina Kris Aquino at Gabby Concepcion

Ibinuking ni Lolit Solis ang tila secret date nina Kris Aquino at Gabby Concepcion noon gamit ang lumang litrato ng dalawa na kanyang ibinahagi sa kanyang Instagram account.

Ayon kay Lolit, noon pa man ay crush na ni Kris si Gabby kaya kilig na kilig daw ang aktres nang makapasok sa showbiz. 

May namagitan daw kina Kris at Gabby, at naisip nilang mag-date sa Anilao, Batangas, sa beach house ng aktor. Pangulo ng Pilipinas daw noon ang ina ni Kris na si Cory Aquino at hindi raw ito payag sa plano ng kanyang anak.

“Of course, hindi papayag si Tita Cory. So ang ginawa ni Tetay, nagpaalam sa mommy niya na may taping siya sa Anilao,” kuwento ng talent manager.

Dahil sa paalam na ito ni Kris sa dating pangulo, nagsagawa raw ng aerial at ocular inspection ang Presidential Security Group (PSG) noong gabi bago ang sinabing taping. Pinasamahan din daw ang aktres ng 16 PSG, mga alalay, kaibigan, at sarili niyang cook.

“Bongga ‘di ba! Ito na, oras na ng uwian. Sabi ni personal cook ni Tita Cory, ‘Sumbong kita mommy mo. Wala naman palang taping. Nagkita lang kayo Gabby dito.’ Hah hah hah. Sagot [ni] Kris, ‘Magsumbong ka, mas maniniwala sa akin si Mommy ‘no,'” patuloy ni Lolit.

“O ‘di ba, bata pa si Kris maabilidad na at kahit bantayan ng 16 PSG, lusot siya. Kaloka talaga si Tetay, hah hah,” dagdag ng talent manager.