EXCLUSIVE: Andrea Torres, naniniwala sa bisa ng simbang gabi

Blessed ang sexy actress na si Andrea Torres dahil sa sunud-sunod na proyekto nito.

Matapos ang second book ng Alyas Robin Hood, busy naman siya sa pagpo-promote ng pelikulang niyang ‘Meant To Beh.’ Gagampanan niya ang role ni Agatha, siya ang magiging rason kung bakit mag-aaway ang mga karakter nina Vic Sotto at Dawn Zulueta nang dahil sa selos.

Kabilang ang pelikula sa Metro Manila Manila Film Festival ngayong 2017 na mapapanuod na ngayong pasko, December 25.

WATCH: Vic Sotto at Kapuso stars bumida sa official trailer ng 'Meant to Beh'

Sa isang interview, tinanong namin si Andrea kung anong paghahanda at plano niya sa nalalapit na Kapaskuhan. Naging panata na raw ni Andrea ang pagsisimbang gabi. Aniya, natutupad ang kanyang mga kahilingan kapag nakukumpleto niya ito.

“Actually ‘pag wala akong taping, ‘pag kaya ng schedule, ginagawa ko talaga [magsimbang gabi].  Na-try ko na siyang gawin at every time naman ginawa ko, nakukumpleto ko s’ya. So, hopefully this year, kung hindi [magkaconflict] sa promo schedule or sa work, sana magawa ko ulit ‘cause it’s true."

Natupad ang kanyang mga kahilingan patungkol sa kanyang career. Nagkaroon siya ng mga proyekto at nabigyan ng break.

“N’ung nalaman ko na may season 2 ang Alyas [Robin Hood], feeling ko kumpleto na ‘yung year ko e. Ang dami na talagang blessings na dumating. So, n’ung dumagdag pa ‘to [Meant To Beh], parang nakakatuwa talaga si Lord minsan pag manggulat, ‘di ba?”

Maliban sa kanyang pelikula, mayroon siyang endorsement na malapit nang ianunsyo.

Ngayong Enero, lilipad papuntang Australia si Andrea para magbakasyon at bumisita sa kanyang kapatid na naka-base roon.