Niño Muhlach, hindi ginustong umabot sa senado ang kaso ni Sandro
Photo Inside Page
Photos
Aminado ang aktor na si Niño Muhlach na masakit para sa kaniya bilang ama ang nangyari sa anak at aktor na si Sandro muhlach. Ngunit pag-amin ng dating Child Wonder of the Philippines, hindi niya ginusto o plinano na umabot sa senado ang naturang kaso.
Matatandaan na noong Agosto ay naghain ng kasong sexual harassment si Sandro laban sa independent contractors ng GMA Network. Dahil dito ay ipinatawag ni Senator Robin Padilla sa senado ang batang aktor at ang mga akusado.
Sa Fast Talk with Boy Abunda nitong Martes, December 3, binalikan ni Niño kung gaano kasakit ang naramdaman niya para sa anak nang marinig niya ang kuwento mula kay Sandro.
Pag-alala ng aktor, “Tito Boy, kasi hindi ko alam - alam mo ba 'yung feeling na may anak? Ta's nakikita mo na nagkukwento sa 'yo kung ano'ng nangyari sa kaniya na hindi niya mahawakan 'yung telepono niya, nanginginig, lagi niyang nabibitawan dahil nga nanginginig siya habang nagkukwento siya ta's umiiyak siya, kung ano'ng nangyari sa kaniya. Napakasakit para sa tatay na ganu'n.”
Pero pag-amin ni Niño, “I didn't want it to turn out like that, hindi ko ginusto na ganu'n.”
Kuwento ni Niño, isa sa mga unang nilapitan niya ay ang Walang Matigas na Pulis sa Matinik na Misis co-star niya na si Senator Bong Revilla Jr. Ngunit sinabi rin ng aktor na hindi niya ginusto na lumaki at kumalat pa ang issue dahil sa kagustuhan niyang protektahan ang anak.
Dagdag pa ni Niño, “Ayoko ring idamay din 'yung GMA kasi alam ko naman na tao lang naman ng GMA 'yung [Boy: Nagtatrabaho dun 'yung dalawang akusado] yes, opo. So kaya hangga't maaari lang, gusto ko sana, tahimik lang. E kaso, pumutok.”
Isa pang ikinasama ng loob ni Niño ay ang mga negatibong komento at pamba-bash na natatanggap ni Sandro Muhlach mula sa netizens. Aniya, ilan sa mga sinasabi nila ay hindi umano totoo ang sinasabi ng kaniyang anak, at mahina ang kasong isinampa nila.
“That's why ako, tumahimik na lang ako, hindi na ako nagsalita after that. Inantay ko na lang lumabas 'yung desisyon ng DOJ dahil tama naman, nu'ng lumabas 'yung desisyon ng DOJ (Department of Justice), talagang matibay nga 'yung kaso and sila na mismo ang nagsabi,” sabi ni Niño.
Get to know more about Sandro in this gallery.
