'StarStruck' days pa lang ni Shayne Sava ay napansin na ang husay niya sa pag-arte kaya naman hindi maitatanggi kung bakit itinanghal siyang Ultimate Female Survivor ng Kapuso reality talent search noong 2019 para sa ika-pitong edition nito.
Napa-wow ang batikang aktres na si Cherie Gil na parte ng council 'StarStruck' Season 7 sa performance ni Shayne sa isang heavy drama artista test nila. Sa katunayan, tinawag pa ng sikat na kontrabida sa telebisyon si Shayne na "fireball."
Dahil sa talento, napabilang si Shayne sa star-studded cast ng 2021 cultural primetime series na 'Legal Wives' kung saan opisyal niyang makatrabaho si Cherie.
Hindi nagtagal, nakamit agad ni Shayne ang kanyang first big break via GMA Afternoon Prime series na 'Raising Mamay' kung saan bida sila ng Comedy Queen at award-winning dramatic actress si Aiai Delas Alas.
Kahit baguhan pa lang sa acting, napahanga agad ni Shayne si Aiai na ina niya sa heartwarming series.
"Magaling si Shayne kahit bata pa. Magaling talaga s'ya and I think 'pag tumanda pa 'to, mas lalo pang gagaling.
"Makikita mo naman 'yun kahit sa simula pa lang, 'pag alam mong talented na 'yung bata, makikita mo na meron siya," pagpuri ni Aiai kay Shayne.
Kilalanin pa ang promising dramatic actress sa gallery na ito:
Nakilala sa showbiz si Shayne Sava, tubong Binangonan, Rizal, nang sumali siya sa 'StarStruck' Season 7 na ipinalabas noong 2019. Siya at si Kim De Leon ang itinanghal nitong winners.
Iginawad kay Shayne ang titulong Ultimate Female Survivor, samantalang si Kim De Leon naman ang nag-uwi ng titulong Ultimate Male Survivor.
Ipinanganak si Shayne noong May 16, 2002. Labingpitong taong gulang pa si Shayne noong sumali siya 'StarStruck.'
Aminado si Shayne na produkto siya ng broken family. Naghiwalay ang kanyang mga magulang noong siya ay anim na taong gulang lang.
Kasama sa prize package ni Shayne sa 'StarStruck' ang management contract sa GMA Artist Center, ngayon ay Sparkle.
Napabilang si Shayne sa star-studded cast ng 2021 GMA cultural primetime series na 'Legal Wives.' Dito ay ginampanan niya ang karakter na Jamilah na mula sa mayamang angkan ng Makadatu. Nakasama ni Shayne dito ang kapwa 'StarStruck' batchmate niyang si Abdul Raman.
Dahil sa kanilang chemistry, kinilala ang tandem nina Shayne at Abdul bilang isa sa limang Sparkle sweethearts.
Mahigit dalawang taon matapos tanghaling 'StarStruck' Season 7 Ultimate Female Survivor, nabigyan agad ng lead role si Shayne sa pamamagitan ng GMA afternoon drama na 'Raising Mamay.' Dito ay ginagampanan niya ang role ni Abigail, isang maalaga at mapagmahal na anak sa kanyang nanay na si Letty na na-diagnose ng regressive behavioral disorder kaya siya ang tumatayong guardian nito. Si Aiai Delas Alas ang nagbibigay-buhay sa papel na Letty, na "Mamay" kung tawagin ni Abigail.
Nakadagdag ang kanyang maamong mukha sa pagiging effective ng kanyang pagganap sa heartwarming drama.
Bagamat baguhan pa lang sa industriya, marami na ang humahanga kay Shayne dahil sa kanilang nakakaantig na eksena ni Aiai sa 'Raising Mamay.'