Marian Rivera at Aiai Delas Alas, 'no dull moment' sa set ng 'Sunday PinaSaya'
Published On: July 27, 2015, 11:21 AM
Updated On: February 23, 2020, 06:18 AM
By BEA RODRIGUEZ
Nagsimula nang mag-taping si Kapuso Primetime Queen Marian Rivera at ang kanyang matalik na kaibigan na si Philippine Queen of Comedy Aiai Delas Alas para sa kanilang bagong show tuwing Linggo, ang Sunday PinaSaya.
Masayang-masaya sila na makatrabaho ang isa’t isa kasama ang Eat Bulaga Dabarkads na sina Jose Manalo at Wally Bayola.
“Magpapasaya kami ng mga tao. Magbibigay kami ng magandang Sunday sa kanila na malilibang sila. Siyempre hindi mauubusan ng tawanan, ang papremyo, so buo na ibibigay namin sa kanila,” saad ni Marian sa panayam ni Lhar Santiago sa 24 Oras Weekend.
Excited na ang Primetime Queen na ibahagi ang kanyang bagong show sa mga manunuod simula ng ika-siyam ng Agosto pero mas natutuwa raw siya na kasama niya si “Little Marian” para ihandog ito sa mga tao.
Maayos ang pagbubuntis ng soon-to-be mom kaya hindi siya nababahalang sumabak sa bagong pasabog ng GMA-7. Nararamdaman niya na umano ang kanyang anak, “Malikot, malikot! Sabi ko nga may mga araw na hindi ako masyado makatulog kasi ang likot talaga. Pero nakakatuwa na nararamdaman ko siya na ganun siya kalikot.”