Nakarating raw kay Alden Richards ang naging pahayag ni Heaven Peralejo tungkol sa kanyang pagiging direktor.
Sa nakaraang panayam ng GMANetwork.com at iba pang entertainment media kay Heaven, napag-usapan ang ginagawa niyang pelikula kasama si Alden. Ang naturang pelikulang may working title na Out of Order ay ang unang movie project ni Alden bilang isang direktor.
Sabi ni Heaven tungkol sa kanyang co-actor at director, “He's a first-time director pero he knows what he wants. He's really like one of the best directors I've ever had.”
Ikinatuwa naman ni Asia's Multimedia Star ang pahayag ng aktres. Sa katunayan, aniya, “Kinilig ako.”
Halos ganito rin daw ang nagiging reaksiyon niya kapag may tumatawag sa kanyang “direk.”
“Nakakatuwa nga po kapag naririnig ko 'yan,” nakangiting sabi ni Alden.
Ibinahagi ni Alden ang papuri sa dalawang huling direktor na nakatrabaho niya: sina Irene Villamor para sa Five Breakups and a Romance at Nuel Naval para sa Family of Two.
Paglalahad ni Alden, “I saw a lot of pointers from them na minsan mare-realize mo na in directing hindi mo kailangang maging academic about it, e. It's about experience, how you want the project to be seen.”
Kaugnay nito, nagpasalamat din ang Kapuso actor sa mga nakatrabaho niya para sa pelikulang nakatakdang ipalabas sa February 2024.
Aniya, “At the end of the day, it's team work. I'm so blessed to have the best team I can work with this project. Kaya parang hindi na rin ako nahirapan really mount it. Sasabihin ko lang how I want the scene to be shot, this is my vision then, they will work around it na po.”
Tila simula pa lang ito ng career ni Alden bilang isang direktor. Nang tanungin kung ano ang dream project niya bilang direktor, sagot niya, “Gusto ko po talaga gumawa o makapagdirek po ng psycho film.
“Kasi, when I've started directing my first film, parang dun ko na-experience yung kung ano yung nagiging imagination ko kapag nababasa ko yung script, yun talaga ang nangyaayari kapag kinukunan ko na siya. Before po kasi, when I do that [as an actor], some the scenes, medyo hindi po nangyayari kung ano yung vision ko. Pero ngayon, kung ano yung nabasa ko, kung paano ko siya gustong mangyari, nagagawa ko.”
Kaya naman para mas mahasa pa sa bagong trabahong ito, sabi ni Alden, “Pagkatapos po nito, kapag nagka-time ako, baka doon ako pumasok sa film school to gain more knowledge about directing.”
Samantala narito ang ilan pang mga aktor na sinubukan na ring maging direktor:
Bukod sa pagganap niya bilang si Napoy sa katatapos lang na 'Royal Blood,' panandaliang naupo rin Dingdong Dantes sa director's chair nang kailangan niyang palitan ang kanilang direktor na si Dominic Zapata matapos nito umalis dahil sa isang emergency.
Kinilala na ng Aliw Awards ang husay ni Ice Seguerra sa pagdidirek ng kanyang anniversary concert na 'Becoming Ice,' na itinanghal para sa award na Best Direction for a Concert. Pero bago ito, unang nakilala si Ice bilang director sa 'Drag Race Philippines: Untucked.'
Naupo rin si Sunshine Dizon sa director's chair noong 2021, nang maging director siya ng original online series na 'B&B: The Battle Between Brody and Brandy,' kasama ang direktor din niya sa'Encantadia' na si Mark Reyes.
Naging TV director naman ang aktor at dating miyembro ng 'That's Entertainment' na si Ricky Rivero. Ang yumaong actor-director ay nakilala bilang direktor na ilang mga TV series. Nabigyan naman siya ng pagkakataong magdirek ng pelikula, ang 'D' Aswang Slayerz' ngayong 2023.
Isa sa achievements ng dating 'Hearts on Ice' actor na si Xian Lim ay ang pagdidirek niya hindi lang ng "Tawid Dagat" music video ni Kapuso star Glaiza de Castro, kundi pati na rin ang isa sa mga episode ng 'Wish Ko Lang' noong 2022. Ngayon taon, nagawa rin ng actor-director ang comedy film na 'Hello, Universe,' na pinagbidahan ni Janno Gibbs.
Bukod sa pagiging aktor ng kapatid ni Chariz Solomon na si Fifth Solomon, naging writer, assistant director, at director din siya sa ilang mga pelikula kabilang na ang Metro Manila Summer Film Festival entry na 'Single Bells.' Siya rin ang naging direktor ng pelikula nina Xian Lim at Ryza Cenon na 'Sa Muli.'
Bukod sa pagiging magaling at primyadong aktres, ipinamalas din ni Gina Alajar ang galing niya sa pagdidirek sa ilang mga serye at pelikula, kabilang na ang hit GMA teledramas na 'The Half Sisters,' 'Impostor,' 'Onanay,' at 'Prima Donnas.'
Bukod sa pagiging actor, dancer, at total performer, isang direktor din si Gab Valenciano. Isa sa mga unang dinirek niya ay ang ariety show na 'Wowowin' noong 2020.
Hindi lang komedyante, naging sikat na direktor din ang yumaong si Philip Lazaro. Kabilang sa kanyang mga naging proyekto ang sitcom na 'Daddy's Gurl,' habang naging assistant director naman siya sa 'The Seed of Love' at 'Prima Donnas.'
Kailan lang ay ibinahagi ni Asia's Multimedia Star Alden Richards na siya ang nag-direct ng isa sa mga eksena sa pelikula nilang 'Five Breakups and a Romance' ni Julia Montes.
Hindi lang isang aktres, writer at direktor din si Bela Padilla. Sa pelikulang 'Yung Libro sa Napanood Ko,' tatlong role ang ginampanan ni Bela--aktor, writer, at direktor.