Lolit Solis, ibinahagi ang detalye ng libing ni Ramon Revilla, Sr.
Idinetalye ni Lolit Solis ang magiging libing ng dating senador at beteranong aktor na si Ramon Revilla, Sr. Namayapa ang huli dahil sa heart failure nitong Biyernes, June 26.
Ani Lolit, “Ililibing na sa Thursday, July 2 si Mang Ramon Revilla, Salve. Sa family mausoleum nila ilalagak ang kanyang katawan katabi ng asawang si Azucena, nanay nila Bong Revilla.”
Palagay ng talent manager ni Bong Revilla, sa kabila ng pagpanaw ng nakatatandang Revilla ay nananatiling malapit ang pamilya at mga anak nito.
Patuloy niya, “Kahit pa nga masakit sa puso ng magkakapatid ang pagkamatay ng ama , sa 93 years nito malaking bonus na para sa kanila na mahaba ang panahon nakapiling nila ito.
“Sobra ang closeness ng magkakapatid, kahit pa nga iyon mga kapatid nila sa ibang naging bahagi ng buhay pag-ibig ni Mang Ramon. Basta para sa kanila, kapatid nila sa dugo ang mga ito, pare-pareho sila ng ama, kaya dapat magkakalapit sila at magmahalan lahat.
“Paalam na Mang Ramon, at patuloy nyo gabayan ang mga naiwan nyong anak.”
Isinugod sa ospital ang ama ng mga Revilla noong May 31 bago ito tuluyang bawian ng buhay. Siya ay pumanaw sa edad na 93.
Official statement of Sen. Ramon "Bong" Revilla, Jr. on the death of his father