John Regala, nakalabas na ng ospital

Nitong Miyerkules, August 12, nakalabas na mula sa ospital si John Regala.

Ang mabuting balita na ito ay mula sa update ng entertainment writer at talent manager na si Aster Amoyo tungkol sa lagay ni John. Matatandaang nagtulong-tulong sina Aster, Nadia Montenegro, at Chuckie Dreyfus para sa pagpapagamot ng kanilang kasamahan sa industriya.

Makikita sa kanyang Facebook post kahapon ng hapon ang mga litrato ni John nang lumabas ito sa ospital.

Ani Aster, “After eight days of confinement at the National Kidney and Transplant Institute (NKTI), actor John Regala is now homebound. Praying that he continues to get better everyday. Many thanks to all those who donated and helped John on his way to recovery.”

Ayon din sa kanyang naunang post, nakausap ni John ang kanyang anak na nasa Amerika. Nakakatanggap din daw ang dating aktor ng suporta mula sa kanyang dating asawa.

Nitong July 2020, naging viral si John matapos mapansin ng isang netizen na nanghihingi ito ng tulong sa gilid ng kalsada. Ang dating action star ay may liver cirrhosis at iba pang health complications.