Beauty Gonzalez, isa nang Kapuso!

Opisyal nang Kapuso ang aktres na si Beauty Gonzalez!

Sa isang virtual event na ginanap noong June 11, pumirma siya ng kontrata sa GMA Network.

Present sa contract signing sina Senior Vice President for Entertainment Group Lilybeth G. Rasonable, First Vice President for Drama Redgie A. Magno, Senior Assistant Vice President for Drama Cheryl Ching-Sy, Senior Assistant Vice President for Alternative Productions Gigi S. Lara, First Vice President for Alternative Productions Darling Bodegon, at Senior Program Manager Anthony Pastorpide.

Naroon din ang manager ni Beauty na si Arnold Vegafria, habang si beauty queen Sophia Senoron ang nagsilbing host ng virtual event.

"Change is always good. I'm so happy to dive into new seas, new adventures because I know and I heard a lot of good stories sa GMA. They are very good to their people and they have really good shows. Nakikita naman natin," pahayag ni Beauty.

Sa kanyang pagpirma, kinumpira ni Senior Vice President for Entertainment Lilybeth G. Rasonable na maraming mga proyektong nakapila para sa aktres.

"We've lined up a soap project for her, a very intersting one. Kakaibang istorya, it's a unique love story. Sa GMA mahilig tayo or mayroon tayong gustong palaging tinatahak na mga baong stories, bagong tema. Beauty will be part of that. May isa pa siyang project na malaki din, na ka-partner ang isa sa mga pinakamalalaki nating mga artista," paliwanag ni Ms. Rasonable.

Nakatakdang bumida ang aktres sa isang romance mini-series na pinamagatang Stories from the Heart: Loving Miss Bridgette.

Nasa ilalim ito ng direksiyon ng award-winning director na si Adolf Alix Jr. Nasa casting stage pa lang ang produksiyon pero ayon kay Beauty, kaabang-abang daw ang magiging leading man niya dito.

"Excited na ko for our new project. It's gonna be with a young man. For a change, mga past characters and love teams are usually older than me. I'm excited to play with this new character sa 'Loving Miss Bridgette.' I love the script. I love 'yung flow ng story. It's gonna be a new change and change is good," lahad niya.

Ito na raw ang proyektong hinihintay niya. Matatandaang naglagi si Beauty sa Dumaguete para magpahinga kasama ang kanyang asawang si Norman Crisologo at anak na si Olivia.

"I was praying for it. I was praying that something would come to me, good projects. In life kasi you never know when lightning strikes so you better grab every opportunity that is given to you. I don't want to miss a thing. I know that I'll do good things here in GMA.

"This is a new Beauty, a different Beauty. It's the right time," aniya.

Welcome to GMA, Beauty!