Around GMA

Article Inside Page

Makapigil-hininga ang huling performance ng awesome aerialist na si Marvin Peralta sa grand finals ng ultimate talent competition na Battle of the Judges.

Ipinamalas niya ang kanyang talento sa pagpo-pole dancing at aerial acrobatics gamit ang hanging tube, aerial silk, at hook.

Parang lumilipad sa hangin si Marvin nang maglambitin sa pole at magpaikot-ikot, na hinangaan ng judge na si Boy Abunda.

Komento ng King of Talk, "What special about Marvin, ako ha, your opening was very strong, do'n pa lang sa pole para kang lumilipad. Ang maganda, you make it look easy and, to me, that's genius."

Sumang-ayon naman ang premier leading lady na si Bea Alonzo sa obserbasyon ni Tito Boy.

Ayon sa Love Before Sunrise actress at Battle of the Judges judge, dama niya ang emosyon ng father of two na si Marvin na nag-perform sa saliw ng kantang "Kanlungan" ni Noel Cabangon.

Aniya, "Tama si Tito Boy. You do everything with ease, lahat. Napaka-graceful ng bawat galaw mo. Ikaw, ninanamnam mo 'yung music so nananamnam din namin 'yung performance mo, ramdam. It was such a beautiful, beautiful, performance. Damang-dama namin na inaalay mo talaga ito sa mga anak mo."

Para naman sa GMA top executive na si Atty. Annette Gozon-Valdes, isang expert si Marvin sa larangan ng aerial arts.

Ika ng hurado kay Marvin, "You're such an expert at what you do and I know it takes such hard work time, effort, and energy para ma-achieve mo 'yan kaya saludo ako sa 'yo."

Naniniwala naman ang judge-mentor ni Marvin na si Jose Manalo na karapat-dapat siyang manalo bilang kauna-unahang kampeon ng Battle of the Judges dahil sa kanyang talento.

Bahagi ng TV host and comedian, "Umpisa pa lang, first round lumaban s'ya. Alam mong pang malakasan na talaga 'yung gagawin n'ya. Itong si Marvin pwede mong gayahin pero 'di mo pwedeng tapatan 'yung galing n'ya."

Tinalo ni Marvin ang anim na iba pang grand finalists sa "Ultimate Battle" o championship round ng Battle of the Judges.

Bilang winner, nakapag-uwi si Marvin ng isang milyong piso bilang cash prize.