Dingdong Dantes, aminadong nahirapan sa lock-in taping ng 'DOTS Ph'

Kamakailan ay natapos na ng production team at cast ng Descendants of the Sun (Philippine Adaptation) ang halos dalawang linggong lock-in taping para sa mga bagong episode ng serye.

Dahil sa mga pagbabagong bunsod ng COVID-19 pandemic at nakasanayang mga gawain o bagay sa loob ng anim na buwang quarantine, aminado si Big Boss Dingdong Dantes na nahirapan siyang mag-adjust sa taping.

Source: dongdantes (IG)

“Hindi siya madali. Parang kulang na nga lang, bitbitin ko 'yung buong bahay, 'yung buong kusina. Siyempre ang habol mo diyan kahit papaano ay 'yung comfort mo,” aniya nang makapanayam ng 24 Oras.

Dagdag pa niya, naging “challenging” din kumustahan sa kani-kanilang pamilya dahil mahirap maghanap ng cellphone signal sa gubat ng Tanay, Rizal kung saan sila nag-shoot.

“Medyo challenging 'yung signal sa gubat. May areas lang talaga kung saan mayroon,” dagdag pa niya.

Sa kasalukuyan ay nakauwi na si Dingdong sa kanyang tahanan matapos ang ilang araw na pagsailalim sa self-quarantine.

Source: dongdantes (IG)

Samantala, kamakailan ay kinilala at pinaranagalan ang aktor ng Asian Star Drama Prize Award mula sa Seoul International Drama Awards para sa kanyang pagganap bilang si Captain Lucas Manalo.

“Na-recognize siya internationally and hindi lang internationally kundi sa bansa kung saan nanggaling itong show na ito.

“The show itself also won ng Best Foreign Drama. So, sa category pa lang na 'yon, e, isa nang malaking karangalan 'yon na kasama ako sa show na 'yon,” lahad niya.

Bukod dito, inuwi rin ng DOTS Ph ang Best Foreign Drama award mula sa Seoul International Drama Awards.