Around GMA

Article Inside Page

Naglabas ng saloobin ang batikang talk show host at manager na si Boy Abunda sa kaniyang programang Fast Talk with Boy Abunda tungkol sa latest vlog na inilabas ng aktres na si Liza Soberano.

Matatandaan na naglabas si Liza ng 14-minute vlog sa kaniyang YouTube channel, kung saan ikinuwento niya ang kaniyang buhay noon sa nakalipas na mga taon at ang bagong direksyon ng kaniyang karera ngayon.

Para sa King of Talk, siya ay “extremely disappointed” sa vlog ni Liza at inilahad ang kaniyang saloobin bilang isang manager. Ayon kay Tito Boy, mayroong karapatan si Liza para magbago ng management, magbahagi ng kaniyang nararamdaman, at para hawakan ang kaniyang karera.

Aniya sa “Today's Talk” segment, “She has the right to do what she's doing. It's a redirection, it's a rebrand. Saan ako na-disappoint? Bilang manager at bilang fan, let me talk first as a manager kasi ho may mga complaints doon na 'I had no voice. Wala akong kinalaman. Hindi ako tinatanong kung ano'ng nangyayari sa aking karera. I was just working with three directors na paulit-ulit.'

“Masakit pakinggan kasi you were working with three of the best directors in this country. At bilang tagahanga, ang gusto kong sabihin, Liza, ang hinangaan namin, hindi ikaw 'yon? For the last 13 years, ang hinangaan namin, hindi si Liza 'yon? Because you were saying in your vlog na, 'I had no say kung ano'ng materyal, kung ano'ng sasabihin ko.'”

Kuwento pa ni Tito Boy na kaya niya ibinahagi ang kaniyang saloobin ay dahil mayroon siyang clip sa naturang vlog ng aktres, kung saan nakapanayam niya ito ngunit hindi masabi ng aktres ang nais niyang ibahagi.

Patuloy niya, “I don't know the intent. I don't know where she wanted to go. Pero kung rebranding lang ito at redirection, medyo masakit lalo na para sa aming mga manager.”

Dahil dito, ibinahagi ng seasoned talk show host ang kaniyang isinusulat na librong pinamagatang “13 things that I know that you may want to know about managing public figures in this country.”

Paliwanag niya, “Ang talent po, pumupunta 'yan sa manager. Nagsasabing, 'gusto ko pong mag-artista, gusto ko pong kumanta, sumayaw, etc.' You plan the career, lahat. You use your connections para lamang makapag-umpisa ang karera ng isang artista.

“It reaches a certain point, ito na 'yung nangyayari na- I'm not talking even about Liza- at a certain point, nababago po 'yung power base. Kapag sumikat po 'yan--katulad ng pagsikat ni Liza Soberano--nababago po kung nasaan na po ang power base. Doon na nagbabago 'yung lente, 'yung kaniyang prism na 'This is what I want. I want more, etc,' na masakit dahil you can proceed with your career, you can redirect your career, pero sana you can journey in gratitude.

“Sana baon mo ang pagpapasalamat sa lahat ng mga nangyari at sa lahat ng mga taong dumaan sa buhay mo at kasama mo because you are where you are today dahil sa mga taong tumulong.”

Pahayag pa ni Tito Boy na walang nasayang sa lahat ng nangyari kay Liza Soberano.

“Lahat 'yan nagiging point of reference mo, 'Ah, ito pala ibig sabihin no'n.' Medyo masakit din po pakinggan 'yung even the choice of my name na 'Liza,' she had nothing to do with it. Pero Liza, 'yun ang hinangaan namin, 'yun ang kinilala namin. And what we knew at hinangaan namin was a good girl.

“Ang hinangaan namin was an excellent actor. Huwag mong isantabi. Do not disregard your past. Do not disregard the 13 years na minahal ka ng fans mo and do not disregard the hard work that your managers put into who you are today," saad niya.

Isang mensahe naman ang hatid ng King of Talk para sa Fil-American star, “In one line. You know Liza, I love her. I love you if you're watching this. Proceed with your career wherever you want to go in gratitude. You know what you should do? Say thank you because gratitude opens your heart and your life to more blessings.”

Para naman sa iba pang maiinit na showbiz balita, tumutok sa Fast Talk with Boy Abunda, Lunes hanggang Biyernes, 4:45 p.m. sa loob ng 20 minuto sa GMA Afternoon Prime via television broadcast sa GMA at sa iba pang digital platforms.

LOOK: PRETTIEST PHOTOS OF LIZA SOBERANO