LOOK: Michael V., may shoutout sa 'dependable crew' niya sa 'Pepito Manaloto'

By Aedrianne Acar

Published On: November 24, 2020, 02:57 PM

Nakakawala ng pagod para sa seasoned comedian na si Michael V. sa tuwing nagti-taping siya para sa hit sitcom na Pepito Manaloto Kuwento Kuwento na naka-suporta ang buo niyang pamilya.

At literal na kasama ni Direk Bitoy ang kanyang mga anak sa tuwing may kukunan na eksena sa award-winning show.

Sa Instagram post kamakailan ng mahusay na comedian, may special shoutout siya sa kanyang mga anak na sina Brianna at Milo na tinawag niyang “dependable crew.”

Wika niya, “THAT'S A WRAP!

“Hindi madali mag-shoot from home ng #PepitoManaloto. Buti na lang I have a very dependable crew! It's a small crew but we get the job done and best of all, hugs and kisses lang ang talent fee.”

Umani ng libong likes ang Instagram post ni Michael V. at kahit ang mga co-actors niya sa Pepito Manaloto ay natuwa sa pagiging matulungin ng mga anak nito.

Matatandaan na lumabas sa isang episode noong Setyembre ng Pepito Manaloto ang misis ni Bitoy na si Carol Bunagan.

Tumatayong din siyang manager ng asawa at executive producer ng kanilang production company na Mic Test Entertainment.

Nagkaroon din siya ng guesting kamakailan sa longest-running gag show na Bubble Gang at pati din ang kanilang anak na si Brianna Bunagan.