'Prima Donnas,' sinimulan na ang lock-in taping

Nagkita-kita na muli ang cast ng afternoon drama na Prima Donnas sa unang araw ng kanilang lock-in taping.

Sa litratong ibinahagi ng beteranang aktres na si Chanda Romero, na gumaganap bilang Lady Prima Claveria, makikitang sinusunod nila ang social distancing at nakasuot ng face mask at face shield.

May video naman na ipinakita si Althea Ablan, na gumaganap bilang Donna Belle, kung saan makikita na layu-layo sila habang wala pang kinukunan na eksena.

Pati ang direktor ng show na si Gina Alajar ay naka-suot rin ng face mask, face shield, at protective personal equipment.

Balik taping na ang afternoon show na 'Prima Donnas' na pinagbibidahan nina Jillian Ward, Althea Ablan, at Elijah Alejo. / Source: althea_ablan30 (IG)

Bago bumalik sa taping ang Prima Donnas, sumailalim muna sila sa swab testing sa GMA Network.

Naka-lock-in ang buong cast at crew ng programa at walang pwedeng umalis at umuwi upang maiwasan ang pagkalat ng COVID-19.

Napapanood na ang catch-up episodes ng Prima Donnas mula Lunes hanggang Biyernes sa GMA Afternoon Prime pagkatapos ng Ika-6 na Utos.