Lovi Poe tungkol sa kaniyang Hollywood career: 'Nakaka-intimidate pero masarap 'yung pakiramdam'

Inilahad ni Lovi Poe na nakakakaba ang kaniyang karanasan na gumawa ng pelikula sa Hollywood. Ang aktres, aminadong starstruck sa mga sikat na aktor na nakatrabaho niya.

Sa nakaraan niyang guesting sa “Fast Talk with Boy Abunda,” tinanong si Lovi ni Tito Boy tungkol sa karanasan niya ng paggawa ng pelikula sa Amerika.

“When I shot this movie called ‘Bad Man,’ and I remember, nakakakaba. Kasi nakaka-intimidate. First, lahat ng mga tinitingala mong artista nandoon, si Sean William Scott, si Chance Perdomo, Johnny Simmons, lahat sila nandoon, nakaka-starstruck. Tapos, kailangan buong-buo pa 'yung English mo,” natatawang pag-alala ni Lovi.

“So, nakaka-intimidate, pero masarap 'yung pakiramdam kasi iba 'yung ways nila, pero it's still the same as well kung paano tayo mag-film,” dagdag niya.

Sinabi pa ni Lovi na kinailangan niyang lumabas sa kaniyang comfort zone, at hindi naiwasang makuwestiyon ang sarili.

“Siyempre, dito nakakasalamuha ko na 'yung mga tao, kilala ko. Pero doon parang bago lahat. So, I'm putting myself out there and stepping out of my comfort zone,” sabi niya.

“And may mga moments talaga na kinu-question ko 'yung sarili ko, ba't ko ba ito ginagawa sa sarili ko, na happy naman ako kung nasaan ako, pero I keep pushing myself to the limit. But it's nice. It's a great experience,” dagdag niya.

Sa kabila nito, sumang-ayon si Lovi kay Tito Boy na hindi dapat matapos ang pagkatuto para sa mga pangarap.

“Hindi natatapos. Kasi kailangan, it's a lot of learnings talaga. Kailangan mong matuto every time. The moment that, I read this somewhere, and maybe the moment that you're the most interesting person in the room, you're in the wrong room,” sabi niya.

“But what it means is like you want to learn from different people that you look up to,” dagdag ni Lovi.

Samantala, ibinahagi ni Lovi na may ginawa siyang pelikula na buntis siya na “The Sacrifice,” kasama si Max Collins, at produced nila ng asawang si Montgomery Blencowe. – FRJ, GMA News