DAVAO CITY - Sa Mobile 03 sa 911 nakapaminaw og tarong ang GMA News, banda 11:45 sa gabii, Mayo 22 gi-alarma nga matud pa unom ka taong gisakay sa urban van, color pula nga may plate number SWJ 569, plaka nga iya kuno sa gobyerno.

Sa pagpanubay sa GMA News sa San Pedro Police, na blotter dinhi nga usa ka Catherine Manalo nga mipatala nga duha sa iyang igsoong lalaki ug duha ka British nationals ug duha ka babae ang sakay sa maong van.

Alas nuwebe sa gabii, May 22, mipahawa sa Pinnacle Hotel ang unom ka tao nga sila Alexander Ulysses Manalo, Benjamin Gabriel Manalo, mga babaeng sila Elaine Fides Mondejar, Belia Marie Labastida, ug ang duha ka matud pa British Nationals nga sila Marco Bennet ug Graham Walker. Gisundo kuno sila sa usa ka “Remy".

Banda 10:30 sa gabii, miadto sila ug Pizza haus sa Duterte St., Davao City.

Apan dihang mahinabi sa GMA News ang guard nga nakaduty niadtong tungora nga si Alfie Marsola, wala kunoy urban van nga mi-parada o mihunong sa dapit.

Pagka 11:07 sa gabii, si Elaine Mondejar kuno mitext na og “S.O.S.".

Alas dose sa tungang gabii, Mayo 23, Lunes, nakadawat kuno si Catherine Manalo og tawag sa mga nag gunit sa unom ka tao ug nagpahimangno ang “caller" nga “dapat walang pulis".

Ug sumala sa kapulisang nahinabi sa GMA News, banda ala una sa kaadlawon, nangayo na og ransom money ang mga naggunit sa unom ka tao.

Wala pay opisyal nga pahayag ang Davao City Police Office labot sa nahitabong pagkawala sa unom ug kung kidnapping na ba ang nahitabo.

Sa Apo View Hotel nga balhinan unta nga hotel sa unom, wala usab kunoy nakacheck in nga British Nationals.

Sa kabahin ni Davao City Police Office Chief P/Sr. Supt Rene Aspera, dili pa matawag nga kidnapping ang nahitabo hantud wala pa kiniy igong basehan, sa karon gideklara unang "missing" ang unom.

Samtang buot ni Davao City Mayor Inday Sara Duterte nga sutaon ang background sa babaeng nagsumbong sa maong insidente.