Pilipinas at US, magsasanay malapit sa pinagtatalunang Spratly Islands

MANILA – Sisimulan ng Pilipinas at United States sa susunod na linggo ang 11 araw na maritime security exercises malapit sa pinag-aagawang karagatan ng West Philippine Sea (o South China Sea ). Sa ulat ng Reuters, inihayag umano ni Lieutenant Noel Cadigal ng Philippine Navy, na dalawang US guided missile destroyers at isang salvage ship ang makakasama ng apat na gunboat ng Pilipinas para sa “gunnery, patrol and interdiction drills" na idaraos malapit sa Palawan island. "We will also hold anti-piracy and anti-smuggling exercises and test the interoperability and readiness of the two navies in responding to various scenarios, such as security, disaster and humanitarian assistance," paliwanag ni Cadigal. Muling tumaas ang tensiyon sa pag-aagawan sa naturang bahagi ng karagatan matapos magreklamo ang Pilipinas tungkol sa umano’y panghihimasok ng China sa teritoryo ng mga Pilipino, partikular sa bahagi ng West Philippine Sea na malapit sa Palawan. Pinapaniwalaan na mayaman sa langis at natural gas ang naturang bahagi ng karagatan. Sa kabila ng babala ng China na hindi dapat makialam ang US sa usapin ng Spratly Islands, idineklara kamakailan ni US Secretary of State Hillary Clinton na handang suportahan ng US ang Pilipinas na matagal na nilang kaalyado. "We are concerned that recent incidents in the South China Sea could undermine peace and stability in the region. We urge all sides to exercise self restraint, and we will continue to consult closely with all countries involved including our treaty ally the Philippines," pahayag ni Clinton. "The United States does not take sides on territorial disputes over land features in the South China Sea, but we oppose the use of force or the threat of force to advance the claims of any party," dagdag pa ng US official. Ang gagawing pagsasanay ng Pilipinas at US sa susunod na linggo na tinawag na CARAT o Cooperation Afloat Readiness and Training (CARAT), ay bahagi ng mga military activities ng dalawang bansa na ginagawa taun-taon sa ilalim ng 1951 Mutual Defense Treaty (MDT). — Reuters/FRJ, GMA News