Enrile, pabor na repasuhin ang mga tratado ng Pinas sa US

MANILA – Pabor si Senate President Juan Ponce Enrile na repasuhin ang Mutual Defense Treaty (MDT) at Visiting Forces Agreement (VFA) upang maisaayos ang mga probisyon na agrabyado ang Pilipinas. “Sa akin, kailangan na i-review na natin yun (MDT). Pati yung Visiting Forces Agreement kailangan bisitahin natin muli dahil matagal na ‘yon. That is why we have an oversight committee, Congressional Oversight that we created to review the implementation of all of these treaties. So that if there are any disadvantages that we suffer, then we should correct them," paliwanag ni Enrile sa Senate media nitong Huwebes. Ang pahayag ay ginawa ni Enrile isang araw matapos bumisita sa Pilipinas si US Secretary of State Hillary Clinton para personal na daluhan ang anibersaryo ng MDT. Gayunman, sinabi ni Enrile na kailangan manggaling sa Malacanang ang inisyatibo na repasuhin ng Senado ang nabanggit na mga tratado. Sa pagbisita ni Clinton sa Pilipinas nitong Miyerkules, tiniyak ng mataas na opisyal ng US na nasa “corner" ng Pilipinas ang Washington. Ngunit batay umano sa 17 taong karanasan ni Enrile bilang dating defense minister, hindi dapat basta papaniwalaan ang pangako ng US. “They have made those kinds of pronouncements in the past and at least my experience over a period of 17 years as Secretary of National Defense is that whenever we have a security problem and we try to call upon the United States to help us, there are a lot of arguments that are being raised," paliwanag niya. “So, we will take the statement at face value. The arrangement between the Philippines and the United States does not call for automatic assistance by either party to any problem arising against the others," dagdag ng lider ng Senado. Maging si Sen Miriam Defensor-Santiago ay nagpahayag din na kailangan nang pag-aralan ang naturang mga tratado ng Pilipinas sa US. - GMA News