Hog farm duol sa sapa 'hinungdan' sa Davao Sur fish kill

Sta. Cruz, Davao del Sur — Nanawagan na karon ang Barangay Council sa Inawayan, Sta. Cruz ngadto sa Bureau of Fisheries and Aquatic Resources - XI nga imbestigahan ang pagkamatay sa daghang isda sa Inawayan River. Mag duha ka adlaw na kunong nakita ang daghang mga isda nga manglutaw sa maong sapa, sapa sa isdang "mangagat". Ang nakakaon sa maong isda, nagsuka ug gikalibanga pa kuno. Gawas niini, gireklamo usab sa mga nagpuyo duol sa sapa ang kabaho ug kahugaw sa sapa, hinungdan nga mawad-an na ug gana mukaon ang mga residente duol sa sapa. "Di mi kakaon sa gawas bisan sa sulod sa balay. Ang akong anak nagguol intawon", matud ni Nida Dimal, nagpuyo duol sa sapa. "Mga alas otso sa buntag, nisakit akong tiyan, ug nagsuka-suka ko",  saysay ni Joel Jickerane. Dili na usab magamit sa mga residente ang tubig sa sapa alang sa paglaba ug uban pa sukad mibaho ug nahugaw ang tubig, matud ni Kapitan Rafael Manos. Ang baboyan duol sa maong lugar maoy gitudlong hinungdan niini. Gisulayan sa GMA News ug kuha ang kabahin sa maong baboyan apan wala ang mga opisyal niini. Andam sa kanunay ang GMA News alang sa ilang kabahin. — Marlon Palma Gil /GMA News, Davao