Mga traysikad, gipanakop sa Davao City

Giharos sa Traffic Management Center sa Davao City ug panakop sa mga traysikad nga namasahero sa mga nagunang kadalanan sa Davao sama sa Uyanguren ug Magsaysay.   Sa ordinansa sa dakbayan, bawal ang mga padyak sa mga main city roads sanglit nakadugang kini sa pagkabalda sa dagan sa trapiko.   “That is under City Ordinance No. 52. We will keep on apprehending these traysikad basta musulod sila sa Uyanguren, Magsaysay ug Monteverde, so dapat didto lang sila sa ilang area”, pagpaklaro ni Ret. Col. Desiderio Cloribel, hepe sa TMC.   Kabahin usab kini sa operasyon sa TMC karong kapaskuhan aron muluag ang mga nagunang kadalanan, ilabi pa nga nakadugang usab sa kaguot sa kadalanan mao ang side walk vendors.   Busa gawas sa mga padyak, nanawagan usab ang TMC sa tanang mga sidewalk vendors nga mutuman sa 1/3-2/3 policy o 1/3 lang ang i-okupa nga bahin sa sidewalk ug ang 2/3 angayang bakante kini sa mga katawhan.   “We just manage na maagian ang sidewalk, amo gyud sila dakpon. Iconfiscate pud namo ang lamesa ug ilang mga tinda”, bahad ni Cloribel. — Tek Ocampo, GMA Davao