Matandang babae, patay matapos nabundol ng 2 sasakyan sa Quezon City

Patay ang isang matandang babae matapos siyang mabundol ng dalawang sasakyan sa East Avenue, Quezon City nitong madaling araw ng Sabado. Sinisikap ng pulisya na makilala ang biktima na nabundol ng isang Pajero at isa pang kotse sa kasagsagan ng pag-ulan, ayon sa ulat ng dzBB radio. Hindi rin nakuha ang numero ng plaka ng dalawang sasakyan. Nangyari umano ang aksidente sa bahagi ng East Avenue na malapit sa Bangko Sentral ng Pilipinas at East Avenue Medical Center. Inaalam din ng mga awtoridad ang impormasyon na ilang araw ng nakikitang gumagala sa lugar ang biktima bago ito naaksidente nitong Sabado. -- GMA News