Impeachment proceedings vs Justice Del Castillo tuloy sa Kamara

Ipagpapatuloy pa rin ng Kamara ang impeachment proceedings laban kay Supreme Court Associate Justice Mariano del Castillo na dawit sa kasong plagiarism, ayon sa pinuno ng panel na humahawak sa kaso. Ayon kay Iloilo Rep. Niel Tupas Jr., chairperson ng House committee on justice, kayang pagsabayin ng panel ang paghahanda para sa impeachment trial ni Chief Justice Renato Corona at ang pagpapatuloy sa impeachment proceedings laban kay Del Castillo. “Napag-usapan na rin ng ilang members ng committee na ipagpatuloy ‘yung Del Castillo impeachment complaint. Naisip namin na magkaroon ng botohan the first week ng resumption ng Congress,” aniya. Inaakusahan si Del Castillo ng betrayal of public trust matapos umano niyang kopyahin ang ilang bahagi ng isang foreign ruling sa sinulat niyang desisyon nang walang pahintulot. Giit naman ni Deputy Speaker Raul Daza, miyembro ng House prosecution team para sa pagdinig kay Corona, hindi maaapektuhan ng pagpapatuloy ng impeachment proceedings laban kay Del Castillo ang paghahanda sa pagdinig kay Corona na magsisimula sa Jan. 16. “Walang conflict ito," aniya. "Ang trial sa Senate ay hapon, ang committee hearings sa umaga. Pwede ipagpatuloy ang proseso sa impeachment ni Del Castillo." Nitong Dec. 12, 188 mambabatas ang lumagda sa impeachment complaint laban kay Corona, na inakusahan ng betrayal of public trust, culpable violation of the Constitution, at graft and corruption. Magugunitang iminungkahi ni Ilocos Norte Rep. Rodolfo Fariñas, vice chairperson ng House justice committee, ang pagbabasura sa kaso ni Del Castillo upang mas mapagtuunan ng pansin ng Kamara ang pagdinig kay Corona.   Tinanggihan ito ni Tupas. “Ang proseso ay itutuloy natin para malaman kung madi-dismiss ang complaint o magpapatuloy ang impeachment process…. Mandated kami ng Constitution na tapusin ang Del Castillo impeachment whether for dismissal or for impeachment,” aniya. — Amanda Fernandez/KBK, GMA News