Call center companies sa Cebu, nagpabiling lig-on bisan pa sa House Bill 35-96 sa America

Nakahimo ug kabalaka sa kadaghanan ang pagsulong sa House Bill 35-96 o ang US Call Center Workers and Consumer Protection Act. Gikabalak-an nga kung mapasar ang maong balaudnon, mawagtangan ug trabaho ang kadaghanan sa mga Pilipino nga nagtrabaho sa Business Process Outsourcing o BPO industry. Sa Cebu, adunay moabot sa 50 mil ka mga empleyado sa 30 ka mga call center companies. Daghan sa mga kompaniya sa Estados Unidos ang mag-outsource sa diri sa Cebu tungod usab sa kamaayo sa mga Cebuanos sa pinulungang English. Kung mapasar ang nahisgutang balaudnon sa Estados Unidos, dili mahatagan ug pinansyal nga tabang sama sa federal grants o federal guaranteed loans ang American companies sulod sa lima ka tuig kung magtukod sila ug call centers sa gawas sa Estados Unidos. Tumong niining maong House Bill ang paghatag ug prayoridad sa mga call center operators sa 13 milyones ka mga unemployed sa America. Apan alang sa Cebu Educational Development Foundation for Information Technology o CEDFIT, wala’y angay ikabalaka ang mga nanrabaho sa BPO sector. “As long as we remained globally competitive like we deliver the best service and at the right cost then Cebu, and the whole Philippines, will always be a preferred location for (the) IT-BPO Industry" pasabot ni Wilfredo Sa-a, Executive Director sa CEDFIT. Karong tuig 2012, adunay tulo ka dakong BPO Companies ang magbukas sa Cebu, butang nga makatabang pa sa paglambo sa maong industriya sa Sugbo. “In fact, they have been forecasting at least 20% growth for 2012 so it is definitely not a sunset industry, we are still rising" dugang pa ni Sa-a. -- Lou-Anne Mae Rondina/FRJ, GMA News