Floating bookstore nga MV Logos of Hope ania sa Cebu

Gibuksan na sa publiko ang labing dako nga floating bookstore sa tibuok kalibutan – ang M/V Logos of Hope, ang sister ship sa M/V Doulos nga una nang nibisita diri sa Sugbo pipila ka tuig na ang milabay. Dala sa maong barko ang libuan ka mga libro nga mapalit sa tanang mahiligon sa pagbasa. Matud sa tigdumala sa barko, una sa tumong niini ang pagsabwag sa kaalam pinaagi sa mga libro ug sa ubang learning materials. “A larger space than we had on the Doulos, leading on to a journey of life. We will walk you to a story, triggering some thoughts ‘Where am I at my life? What are the joys that I do in my life?’ padayag ni Gian Walser, Director sa M/V Logos of Hope. Una ang pormal nga pagbukas sa barko adunay hamubo nga programa kung diin nag-present ang kapin sa 400 ka mga crew sa barko. Ang mga crew gikan sa nagkalain-laing nasud ug tulo kanila, mga Pilipino. Gani, gipaambit ni Rex Quiño, usa sa Pilipinong crew sa barko, ang iyang kasinatian. “They love Filipinos here especially the smile, the attitude (of) being hospitable” matud ni Quiño. Molungtad ug tulo ka buwan ang pagdaong sa barko sa Aduana sa syudad sa Sugbo. Bukas kini matag Martes hangtud Sabado, alas-10 sa buntag hangtud alas-9:30 sa gabii. Kung Domingo, ablihan kini matag ala-una hangtud alas-9:30 sa gabii. Nagkantidad og P20 ang entrance fee sa floating bookstore. — Bexmae Jumao-as /GMA Cebu