Ipinasang panukalang batas para sa fixed term ng AFP chief, ibinasura ni PNoy

Ibinasura ni Pangulong Benigno “Noynoy" Aquino III ang ipinasang panukalang batas ng Kongreso na bigyan ng three-year fixed term ang mga itatalagang pinuno ng Armed Forces of the Philippines (AFP). Sa panayam ng mga mamamahayag sa ceremonial switch-on ng electrification program sa Malacañang, ipinaliwanag ni Aquino na ang desisyon niya na i-veto ang naturang panukalang batas dahil sa labag ito sa isinasaad ng Konstitusyon. Salungat umano ang naturang panukalang batas sa Article XVI, Section 5 paragraph 5 ng ng 1987 Constitution na tumatalakay sa retirement period ng mga opisyal sa militar. Nakasaad sa probisyon na: “Laws on retirement of military officers shall not allow extension of their service." Ngunit sa ipinasang panukalang batas ng Kongreso, ipagpapaliban ang pagreretiro ng isang AFP chief kapag hindi pa nito natatapos ang kanyang tatlong-taong termino. “May provision sa bill na nagsasabi na kung hindi nakumpleto yung three years, umabot na yung retirement niya e idedefer yung retirement hanggang sa makumpleto ang term. Paniwala ko parang may violation," paliwanag ng pangulo nitong Biyernes. “Ilalagay natin ang sarili natin sa sitwasyon na potentially may violation ng Constitution. Bawal 'yung extensions," dagdag niya. Itinatakda ang mandatory retirement age ng isang opisyal sa militar sa edad na 56. "Pag dinefer mo yung retirement, i-e-extend mo yung services, hindi tama yun," pagdiin ni Aquino said. Sa Camp Aguinaldo, sinabi ni Col. Arnulfo Marcelo Burgos, military information chief, na iginagalang nila ang desisyon ng Pangulo, na siya ring commander-in-chief ng Armed Forces at Philippine National Police. “We will honor and respect the decision of the President... with or without the fixed term, the AFP will continue to work harder to professionalize our ranks and strive to be more efficient, and effective in the performance of our mandate," pahayag ni Burgos. Idinagdag niya na hindi maapektuhan ang morale ng mga sundalo sa pag-veto sa naturang panukala. Isa sa mga pangunahing dahilan kaya ipinasa ng Kongreso ang naturang panukala ay upang matigil ang tinatawag na “revolving door policy" kung saan itinatalagang AFP chief ang mga paparetirong opisyal. Nakasaad naman sa Saligang Batas na may kapangyarihan ang pangulo na palawigin ang termino ng isang opisyal ng AFP kung mayroong digmaan o iba pang national emergency na idineklara ng Kongreso. “The tour of duty of the Chief of Staff of the armed forces shall not exceed three years. However, in times of war or other national emergency declared by the Congress, the President may extend such tour of duty," nakasaad sa paragraph 7, Article XVI, Section 5 ng Konstitusyon. -- FRJ, GMA News