GMA News Online
Ulat Filipino
»
Cebu

Danao Comelec office, gituyo pagsunog?

February 3, 2012 1:52pm
Nasunog alas-kwatro sa kaadlawon niadtong Lunes ang buhatan sa Commission on Elections sa Danao City. Lakip sa nasunog ang machine kung diin naka-save ang lista sa mga botante sa maong dakbayan.

Lakip sa nabasa sa tubig nga gipukan sa kayo mao ang mga computer nga anaa sa buhatan.

Gikordon ang buhatan sa Comelec human sa sunog nga wala hinuon mikuyanap ang kayo.

“Naa tay equipment dinha nga nangasunog, specifically kanang mga equipment nga na-damage among others, ang atong voting registration system machines” matud ni Atty. Dominic Marigomen, City Election Officer sa Danao.

Pamasangil ni Konsehal Jojo Roble, tinuyo ang pagkasunog sa opisina.

“Aw, sigurado ko ang kadtong nagbuhat ato di siya ganahan sa gibuhat sa Comelec. Di siya ganahan madayon kung unsay gitrabaho karon especially up coming atong recalls” pahayag sa konsehal nga tataw nga gitudlo si Danao City Mayor Ramon “Boy”Durano.

Kahinumduman nga adunay nag-ung-ong nga recall petition batok kang Mayor Durano. Gikuwestyon sa iyang mga kaatbang sa politika ang giingong mga iregularidad sa iyang pamunuan.

Hugot hinuon nga gihimakak ni Durano ang maong mga pasangil ug gibali ang kampo sa bise-alkalde ug mga konsehal.

“Tinud-anay palpak sila sa ilang katuyuan mao na nga gisunog nila. Sila maoy nagsunog anang Comelec kay aron ipasangil dinhi nako. Nganong hilabtan ta man ang Comelec maoy nagpili? Ang katawhan maoy nagpili nato sa atong posisyon,” sumbalik nga pasangil ni Durano.

Dali hinuon nga nakigpulong ang mga opisyal sa Comelec-Danao sa mga opisyal sa lungsod. Gihigpitan usab ang seguridad sa opisina.

“ang among kuan karon unsaon namo nga ma-protect ang among records. That’s why we are asking the help of the Philippine National Police and both of the parties” matud usab ni Atty. Lionel Marco Castillano.

Padayon pa ang imbestigasyon sa mga awtoridad sa nahisgutang sunog. — Jun Veliganio /GMA Cebu



We welcome healthy discussions and friendly debate! Please click Flag to alert us of a comment that may be abusive or threatening. Read our full comment policy here.
Comments Powered by Disqus