Senado bumoto ng 13-10 pabor sa SC TRO sa dollar accounts ni Corona

Sa 13-10 na botohan, napagkasunduan ng Senado, umuupo bilang impeachment court, na kanilang susundin ang utos ng Korte Suprema na huwag suriin ang dollar accounts ni impeached Chief Justice Renato Corona.

 

Inihayag ito ni Senate President Juan Ponce Enrile, namumunong opisyal sa impeachment trial, sa paglilitis nitong Lunes ng hapon. Isinagawa ng senator-judges ang botohan sa caucus nitong umaga.

 

"The 13 members of the court opted to respect the TRO issued by the SC from this particular issue regarding the matter raised by the PSBank with respect to the alleged foreign currency deposits of the respondent [Corona] in that bank," ani Enrile.

 

Binoto nina Enrile, Senators Joker Arroyo, Miriam Defensor-Santiago, Manuel Villar, Ralph Recto, Francis Escudero, Koko Pimentel, Loren Legarda, Gregorio Honasan, Ramon Bong Revilla Jr., Ferdinand Marcos Jr., Jinggoy Estrada, at Vicente Sotto III ang pananatili sa temporary restraining order na inihain ng SC.

 

Samantala, bumoto naman ng taliwas sina Senators Franklin Drilon, Alan Peter Cayetano, Pia Cayetano, Sergio Osmena III, Edgardo Angara, Panfilo Lacson, Francis Pangilinan, Antonio Trillanes IV, Lito Lapid, at Teofisto Guingona III.

 

Naganap ang caucus isang araw matapos akusahan ng mga abugado ni Corona ang Malacañang sa pamimigay umano ng P100 milyon sa mga senator-judge kapalit ang kanilang paglabag sa TRO ng mataas na korte.

 

Sa simula ng pagdinig nitong Lunes, inihayag ng ilang senator-judge ang kanilang pagkadismaya sa ipinakitang "disrespect for the court" ng defense panel. Humingi naman ng paumanhin si Atty. Jose Roy II para sa mga abugado ni Corona.

 

Naunang ipinatawag ng Senado ang mga representative mula sa Bank of the Philippine Islands (BPI) at Philippine Savings Bank (PSBank) upang tumestigo sa Article II ng reklamong impeachment, na inaakusahan si Corona ng failure to properly disclose all his assets sa kanyang Statements of Assets, Liabilities and Net Worth (SALNs)

 

Noong Miyerkules ng nakaraang linggo, inamin ni PSBank President Pascual Garcia III sa impeachment court na halos umabot na ng P20 milyon ang savings ni Corona noong 2010.

 

Inakusahan din ng prosecution si Corona na mayroon itong dollar accounts sa PSBank na mayroong laman na US$700,000 (P30 milyon).

 

Tumanggi naman si Garcia na magbigay ng impormasyon kaugnay ang limang dollar accounts ni Corona, sapagkat maaari umano ito maging criminal liability sa kanya. Naghain na ng petisyon ang PSBank sa SC upang huwag suriin ang mga dokumentong kaugnay sa foreign currency bank accounts ni Corona. — Amanda Fernandez/RSJ, GMA News