Kwentong Kapuso: Alis Sa (Pilipinas Kong) Wonderland

Alis sa Wonderland Ni Edwin B. Cano May lumbay sa aking paglisan Nangakong 'di ka tatalikuran Bagkus naglayag at lumipad Ngayo’y sa malayo napadpad Buhay na para sa bayan Baka 'di na magampanan Binili ng ginhawa Sa 'di kayumangging lupa Puso at isip, 'di payapa Bawat sandali, sa bawat diwa Sa paghimlay hanggang sa pagmulat Mukha mo nakaukit sa’king palad Paglingkuran aking kakulay Upang uhaw sa iyo’y manamlay Buhay mo at wika isalaysay Taas ang noo at may pugay O Pilipinas, aking Wonderland May mahika kang 'di mahawakan May linis ka’t may dungis Subalit nag-iisa, walang kaparis Dinggin mo aking sambit Nawa’y maghintay, manabik Sa muli kong pagtapak, pagbalik Yakapin kang buong higpit. -- GMA News.TV Si Edwin B. Cano, taga-Angeles City, Pampanga at kasalukuyang nasa NY, USA. Ano ang kwento mo? Mga Kapuso, tuloy ang kwentuhan. Sana’y hindi kayo magsawa sa pagtangkilik sa ating pitak na ito. Habang may mga kababayan tayo sa abroad - pati ang kanilang mga kabiyak, anak, ina, ama o sinuman na kabahagi ng kanilang buhay - na nais magpaabot ng kanilang saloobin, mananatili po ang inyong Kwentong Kapuso. Katulad ng dati, hindi kami magsasawa na basahin ang inyong mga kwento - maigsi man o mahaba. Kahit na ang laman nito ay naglalabas ng sama ng loob, nagbibigay ng inspirasyon, gustong magpayo, magsumbong, magpatawa o kahit nagpapalipas lang ng oras. Kaya hihintayin namin ang inyong mga email na maaari ninyo itong ipadala sa Pinoyabroad@gmanews.tv Sa inyo mga kababayan namin saan mang dako sa mundo, kami po'y saludo sa inyo. Kaya ilabas ang iyong saloobin, ikuwento mo Kapuso!