International media groups, pinaalahanan si PNoy sa pangakong proteksyon sa mga mamamahayag

Matapos ang pambubugbog at pamamaril sa isang Palace reporter nitong linggo, pinaalahanan ng mga international media group si Pangulong Benigno Aquino III sa ipinangako niyang proteksyon para sa mga mamamahayag.

 

Nanawagan ang International Federation of Journalists, Reporters Without Borders at Committee to Protect Journalist sa mabilisang aksyon upang makamit ang hustisya sa pag-atake sa mamamahayag ng The Daily Tribune na si Fernan Angeles.

 

Binugbog at binaril si Angeles malapit sa kanyang bahay sa Pasig City noong Linggo ng gabi. Kasalakuyan pa siyang naka-confine sa Pasig City General Hospital.

 

“We call upon President Benigno Aquino III to honor his pre-election commitment to defend press freedom in the Philippines, by seeing that all attacks on media workers are investigated and the perpetrators held accountable for their crimes,” inihayag ni IFJ Asia-Pacific Director Jacqueline Park sa isang artikulong lumabas sa kanilang website noong Marso 14.

 

Maliban dito, ayon kay Park, mahalaga ring matukoy ng mga pulis kung kaugnay ang pag-atake kay Angeles sa kanyang trabaho bilang mamamahayag. “The IFJ condemns the shooting and is concerned by what appears to be a continuing escalation of violence against journalists in the Philippines in 2012.”

 

Kasalakuyan pang nagsasagawa ng imbestigasyon ang mga awtoridad upang matukoy ang sanhi ng pananambang. Siniguro naman ng Malacañang sa pamilya ng biktima ang proteksyon.

 

Mapanganib na lugar para sa mga mamamahayag

 

Ayon sa IFJ, na nagrerepresinta sa mahigit 600,000 mamamahayag sa 131 bansa, nananatili pa ring isa sa mga mapanganib na lugar ang Pilipinas para sa mga mamamahayag.

 

Nakasaad sa datos ng National Union of Journalists of the Philippines na 148 mamamahayag na ang napatay sa bansa mula nang ibinalik ang demokrasyon noong 1986, ayon sa grupo.

 

Pinahalagahan naman ng Reporters Without Borders (Reporters Sans Frontieres/RSF) ang progreso sa imbestigasyon at pagtukoy sa suspek na isinagawa ng Philippine National Police.

 

"(W)e hope they will not rule the possibility of a link to the victim’s work as a journalist, as several sources close to the case suspect,” ani Reporters Without Borders.

 

Dagdag nito, ang pag-atake kay Angeles ay nananatiling "part of a general climate of violence affecting the media that is caused in part by mafia groups."

 

Sa kabila nito, patuloy pa rin ang panawagan ng RSF sa administrasyon Aquino upang protektahan ang mga mamamahayag sa bansa mula sa kapahamakan habang ipinaglalaban ang katotohanan.

 

“We reiterate our appeal to President Benigno Aquino (III)’s government to establish an effective programme to combat armed networks. While combating impunity is the highest priority, thought must also be given to mechanisms for protecting journalists before they fall victim to violence. In view of the gravity of the situation, protecting the media must be a government priority,” ayon nito.

 

Dagdag nito, kanilang isinaad ang pag-atake kay Angeles ay naganap siyam na araw lamang matapos ang pananambang kay Radio Mindanao Network presenter Fernando Gabio na sugatan sa Iloilo City.

 

CPJ, nagsagawa ng sariling imbestigasyon

 

Samantala, nagsasagawa naman ng hiwalay na imbestigasyon ang ikatlong international watchdog group sa pananambang kay Angeles, ang pinakahuling marahas na insidenteng naganap laban sa isang mamamahayag sa Pilipinas.

 

Nanawagan ang New York-based Committee to Protect Journalist (CPJ) sa gobyerno na ipaglaban ang hustisya ng biktima.

 

"Philippine authorities must conduct a timely and thorough investigation to apprehend the criminals responsible for this attack and to determine their motive. Until the justice system can effectively enforce the rule of law, those who attack journalists will continue to act with impunity, and the county's press freedom climate will further deteriorate," ani Bob Dietz, program coordinator ng CPJ's Asia program.

 

"CPJ is investigating the motive in the attack, which left the journalist hospitalized in critical condition," dagdag nito. — Amanda Fernandez/RSJ, GMA News