Halos P3M ang pinakamalaking kinita ng miyembro ng Gabinete ni PNoy noong 2011

Sa 2011 Report on Salaries and Allowances na inilabas ng Commission on Audit (COA), lumitaw na umabot sa halos P3 milyon ang pinakamalaking natanggap ng isang kasapi ng Gabinete ni Pangulong Benigno “Noynoy" Aquino III sa nabanggit na taon. Sa naturang ulat ng CoA, lumitaw na si Foreign Affairs Secretary Albert F. del Rosario ang top earner sa listahan ng mga kalihim ni Aquino. Umabot sa P2.936 milyon ang kanyang natanggap bilang sahod, mga bonus at allowances. Kasama rin dito ang P2 milyon na “discretionary and extraordinary and miscellaneous expenses (EME)." Sumunod kay Del Rosario si Agriculture Secretary Proceso J. Alcala na tumanggap ng P2.27 milyon. Kasama rito ang kanyang P753,345 incentives at allowances bilang board of director ng National Food Authority Council at Philippine Crop Insurance Corp. Wala namang tinanggap sa sahod o allowance si Alcala sa walo pang government-owned and controlled corporations (GOCCs) na inuupuan niya bilang miyembro ng board. Pumangatlo naman sa kitang P2.216 milyon si Public Works and Highway Secretary Rogelio L. Singson. Kasama sa nabanggit na halaga ang discretionary funds at EMEs ng kalihim na umaabot sa P308,280.05 Wala naman siyang tinanggap bilang miyembro ng board ng Intramuros Administration (IA), Philippine Fisheries Development Authority (PFDA) at Tourism Infrastructure and Enterprise Zone Authority (TIEZA). Sumunod naman si Health Secretary Enrique T. Ona na kumita ng P2,182,839.78, na kasama ang P360,000 discretionary funds at EME mula sa Philippine Health Insurance Corp. (PhilHealth). Kahit miyembro ng board sa anim na GOCCs, wala namang sinuweldo dito si Ona. Nakakubra naman ng kita si Justice Secretary Leila M. De Lima na umaabot sa P2,044,891. Hindi rin siya sumahod sa iba pa niyang posisyon. Ang iba pang kalihim na hindi umabot sa P2 milyon ang kita noong 2011 ay sina: -Science and Technology Sec. Mario G. Montejo (P1,999,735.43) -Social Welfare Sec. Corazon J. Soliman (P1,837,487.91) -Budget Sec. Florencio B. Abad (P1,772,104.78) -Finance Sec. Cesar V. Purisima (P1,752,617.57). Wala siyang suweldo sa inuupuang 13 GOCCs. -Defense Sec. Voltaire T. Gazmin (P1,742,438.29) -Com. on Higher Education chair Patricia B. Licuanan (P1,726,551.71) -PCDSPO Secretary Ramon A. Carandang (P1,668,118.12) -National Anti-Poverty Council Sec. Joel Rocamora (P1,589,926.56) -NEDA Director General Cayetano W. Paderanga Jr. (P1,580,121.96). Wala siyang suweldo sa anim na GOCCs. -Energy Sec. Jose Rene D. Almendras (P1,574,118.00). Wala siyang suweldo sa limang GOCCs. -Presidential Management Staff Sec. Julia Andrea Abad (P1,531,114.92) -Environment (DENR) Sec. Ramon Jesus P. Paje (P1,502,121.96). Wala siyang suweldo sa 10 GOCCs. -TESDA Dir. General Emmanuel Joel J. Villanueva (P1,462,122.00) -PCOO Secretary Herminio O. Coloma (P1,454,122.00) -Chief Pres. Legal Counsel Eduardo V. De Mesa (P1,452.121.96) -OPAPP Secretary Teresita Q. Deles (P1,452.121.96) -Presidential Spokesperson Edwin Lacierda (P1,452.121.96) -Executive Secretary Paquito N. Ochoa Jr. (P1,452.121.96) -PCGG chairman Andres D. Bautista (P1,452,118.00) -Nat’l Security Council Dir. Gen. Cesar P. Garcia Jr. (P1,442,344.00) -Local Government (DILG) Sec. Jessie M Robredo (P1,441,238.54). Wala siyang suweldo sa dalawa pang ahensiyang kinabilangan. -Education (DepEd) Sec. Armin A. Luistro (P1,428,375.26) -Agrarian Reform (DAR) Sec. Virgilio R. Delos Reyes (P1,388,303.99). Wala siyang suweldo sa apat na GOCCs. -Trade and Industry (DTI) Sec. Gregory L. Domingo (P1,351,976.36). Wala siyang suweldo sa 12 GOCCs. -MMDA chairman Francis N. Tolentino (P1,240,122.00) -Transportation (DOTC) Sec. Jose P. De Jesus (6 na buwan), (P809,633.03) -DOTC Sec. Manuel A. Roxas II (6 na buwan), (P666.598.68) -Tourism (DOT) Sec. Ramon R. Jimenez Jr. (4 na buwan), (P372,416.00) - DOT Sec. Alberto A. Lim (P761,706.00). Si DOTC Sec De Jesus ay nagbitiw at pinalitan ni Sec. Roxas. Gayundin si DOT Sec. Lim na pinalitan ni Sec. Jimenez. –P.T/FRJ, GMA News