DOH: Peligro sa aerial spraying walay basehan

Human mapalig-on ang city ordinance nga magdili sa aerial spraying sa mga banana plantation sa duol sa Davao City, mipahibalo ang Department of Health nga wala kunoy nahipos nga ebidensya nga makadaot sa panglawas sa katawhan ang aerial spraying. Gikaingon niini nga sayop ang pagtuo nga maapektuhan ang panglawas sa mga residente duol sa mga plantasyon. Sumala pa ni Agriculture Secretary Arthur Yap, wala pa kunoy natala nga kasong namatay o nagkasakit tungod sa aerial spraying. Nipasidaan siya nga sa higayong ipatuman ang ban sa aerial spraying, posibleng maapektuhan ang ekonomiya sa rehiyon og ingon man ang panginabuhian sa daghang mamumuo nga nagsalig sa banana plantation. Gikaingong modako ang galastuhan sa mga kompanya sa saging tungod sa mga kausabang buhaton haom sa bag-ong balaod. Ang siyudad sa Davao usa sa mga lugar sa nasud nga daku ang kita tungod sa eksportasyon sa saging. -Testigo