Paglilitis sa katiwalian sa Macapagal boulevard itutuloy ng Sandiganbayan

Itutuloy ng Sandiganbayan First Division ang pagllitis sa kasong katiwalian laban sa isang pribadong kontratista sa paggawa ng kontrobersyal na P1.1-bilyong President Diosdado Macapagal Boulevard sa Maynila. Sa desisyon ng Sandiganbayan na may petsang February 5, ibinasura ng korte ang mosyon ni Jesusito D. Legaspi ng JD Legaspi Construction, na ibasura dahil sa tehnikalidad ang kasong overpricing na nagkakahalaga ng P360 milyon. Ayon kay Legaspi, limitado lamang ang nasasakupan ng Sandiganbayan sa pagdinig sa mga kaso na ang sangkot ay mga opisyal ng pamahalaan at hindi katulad niya na isang pribadong mamamayan. Ginamit din sa argumento ni Legaspi ang desisyon ng Special Third Division ng Korte Suprema sa kaso ni Henry Go laban sa Sandiganbayan. Ayon kay Legaspi nakasaad sa SC desisyon sa “Sections 3-e and 3-g of Republic Act 3019 or the Anti-Graft and Corrupt Practices Act were only applicable to government officials." Idinagdag sa Section 3-e ng R.A. 3019 na ipinagbabawal ang mga opisyal ng pamahalaan na magbigay sa pribadong partido ng "unwarranted benefits, advantage or preference in the discharge of his official administrative or judicial functions through manifest partiality, evident bad faith or gross inexcusable negligence." Ayon sa Sandiganbayan, ang desisyon ng SC sa kaso ni Go ay hindi “unanimously decided by the justices of the Supreme Court." Idinagdag pa ng anti-graft court na ang nasabing desisyon ay nahaharap sa tinatawag na “legal challenges" na nireresolba ngayon ng SC. At dahil wala pang pinal na desisyon ang SC sa kaso ni Go, paiiralin ng Sandiganbayan sa kaso ni Legaspi ang pasya ng SC sa mga kasong Balmadrid vs Sandiganbayan, at Meneses vs Sandiganbayan. Sa nasabing dalawang kaso, nagdesisyon ang SC na, “private individuals can be charged and convicted, in conspiracy with public officers involved with violation of Section 3-e of RA 3019." “After a serious deliberation, the Court finds the Motion to be without merit. The Henry Go case is concededly still subject to a motion for reconsideration with a prayer that it be referred to the Supreme Court en banc, and therefore the same is not yet final. To say the least, it has not binding effect yet," nakasaad sa desisyon ng korte. - Fidel Jimenez, GMANews.TV