Naging daan ang popular short form video-sharing app na TikTok para pasukin ng DJ/choreographer na si Rhemuel Lunio o DJ Loonyo ang showbiz.
Binansagang "Dance King ng Quarantine" si DJ Loonyo dahil sa kanyang viral dance covers, na na-feature ng iba't ibang media outlets sa bansa.
Higit siyang napansin sa kanyang "Mama Mia" dance cover, kasama ang dalawa pang kapwa dancers, na ipinost niya tatlong araw matapos ipatupad ang community quarantine sa bansa. Sa ngayon, may mahigit 19 million views na ito sa kanyang Facebook page.
Dati nang nakakapag-guest sa iba't ibang TV shows si DJ Loonyo kasama ang kanyang grupong Rock*Well. Pero ngayong taon, dumagsa ang iba't ibang offers at invites sa kanya bilang solo artist.
Ngayong tuluy-tuloy ang paglabas niya sa telebisyon, handa kaya niyang iwan ang kanyang trabaho sa dance studio sa China para mag-focus sa kanyang showbiz career?
Sagot ni DJ Looonyo sa kanyang April 9, 2020 YouTube vlog, "Still don't know but, again, I'm praying kung saan ako ilalagay ni Lord para makapag-inspire pa.
"Ayaw kong kumuha ng job or anything na magtatanggal sa akin sa focus sa responsibility ko rito sa China.
"Then, ang effect niya selfish lang, para sa akin lang, for money or for fame, I don't like that."
"Ang gusto ko, if ever na tatanggap ako ng trabaho, in line siya sa kung ano yung naiisip ko or ano yung goal ko, 'yung mission in this world."
Para sa ilan pang detalye tungkol sa showbiz career ni DJ Loonyo, tingnan ang gallery na ito:
Ang GMA Sunday noontime show na 'All Out Sundays' ang isa mga unang nakapag-guest kay DJ Loonyo, na nasa China noong panahong iyon. Sa kanyang virtual guest appearance, pinauso niya ang "Dati" dance challenge na sinubukan nina Rayver Cruz, Miguel Tanfelix, at Mavy Legaspi.
Hindi lang isang beses nakapag-guest si DJ Loonyo sa Stay Home Party edition ng 'All Out Sundays' dahil napanood din siya dalawa pang episodes nito, kung saan game siyang nakisayaw sa virtual production number kasama ang ilang Kapuso stars at isa riyan ang "Bad Boy ng Dance Floor" na si Mark Herras. Ayon kay Rayver, kaya malapit si DJ Loonyo sa GMA stars ay dahil naging choreoprapher siya musical variety show na 'Studio 7.'
Si Jak Roberto ang napililing bida sa life story ni DJ Loonyo sa July 18 episode ng '#MPK' o 'Magpakailanman.' Ayon kay Jak, naka-relate daw siya sa pangungutya na natanggap ng viral dancer at choreogprapher. Ika ng Kapuso actor, "Hindi talaga maiiwasan 'yun eh pagka public figure ka. May magawa kang maganda at hindi maganda, mayroon masasabi sa iyo 'yung tao."
Naging kontrobersyal ang pagpalalabas ng buhay ni DJ Loonyo sa 'Magpakainlanman' nang mag-react dito ang kanyang ex-girlfriend,na nabuntis niya, si Aika Flores. Naglabas naman ng statement ang kampo ni DJ Loonyo tungkol sa nasabing #MPK episode para depensahan ito. Nakasaad dito, "We, as a management and team, signed a contract allowing the program to enhance certain aspects of his life, because it is still, in fact, for a dramatic TV show retelling."
Ini-release ni DJ Loonyo ang kanyang first single na pinamagatang "Teka Muna" noong September 8 sa kanyang YouTube channel, na mayroong mahigit 1.31 million subscribers. Noong araw ding iyon, nakuha nito ang top spot sa iTunes Philippines.
Kung napatunayan ang husay niya sa dance floor, nasubukan naman ang comic timing ni DJ Loonyo kasama sina Bossing Vic Sotto, Maine Mendoza, at Wally Bayola sa October 3 episode ng 'Daddy's Gurl.' Ginampanan ng viral dancer sa Kapuso sitcom ang papel ni DJ Angel na bida sa deodorant commercial na shino-shoot ni Stacy (Maine Mendoza).