Rufa Mae Quinto, nagdaos ng simpleng birthday party habang naka quarantine

Nasa San Francico, California pa rin si sexy comedienne Rufa Mae Quinto kung saan inabutan siya ng quarantine na dulot ng COVID-19.

Doon na rin niya ipinagdiwang ang kanyang birthday noong nakaraang Huwebes, May 28.

Kabilang ang San Francisco sa mga lugar na may mandatory "shelter-in-place" order. Ibig sabihin nito, dapat manatili sa kanilang mga tahanan ang mga residente dito.

Gayunpaman, nag-enjoy pa rin si Rufa Mae dahil kasama niya ang kanyang anak na si Alexandria at asawang si Trevor Magallanes.

"Sino ba sa amin ang may birthday at sila ang nag blow ng candles ko? I love you guys @trevvvsilog and @alexandriamagallanes , shelter in place birthday , nag luto Lang mother in law ko ng dinner namin, ito ang ganap ng birthday ko , so sweet of them . I'm so lucky to have a family in the US," sulat niya sa Instagram kalakip ng ilang litrato kasama ang birthday cake niyang may mga kandila.

Nagdaos din siya ng simpleng salu-salo sa kanilang bakuran.

Ilang Filipino food na miss na miss na daw niyang kainin ang naging bahagi ng handa ni Rufa Mae.

"Todo na to , ngayon ko Lang na post pero may 28 ito , noong birthday ko talaga, na share ko Lang . Go go go! Fish ball, Isaw, burong Isda kapampangan , sinigang na hipon, mussels, chicken and pancit for long life, okra, talong . Mga Filipino food na na miss ko kainin sa Pilipinas," aniya.

Matatandaang Pebrero lumipad patungong Amerika si Rufa Mae kasama ang kanyang anak na si Alexandria para makapiling ang asawang si Trevor.

Dalawang linggo lang ang plano niyang pamamalagi sa Amerika pero hindi na nakabalik ng Pilipinas dahil sa lockdown doon.