Ang pag-ibig ay misteryoso, makapangyarihan at minsan mahirap maunawaan. Kaya nga kapag may mga taong nasa isang relasyon na hindi pangkaraniwan o 'di kaya'y hindi naaayon sa kung ano ang kinokonsidera ng lipunan bilang normal o nararapat, madalas sila ay kinukutya o pinupuna.
Noong unang panahon, isang taboo o paksang hindi madalas pag-usapan sa publiko ang mga May-December love affair, o 'yung mga magkarelasyong malaki ang agwat ng edad.
Ang nakasanayan kasi ng mga Pilipino ay magkalapit lamang ang edad ng mga magkasintahan o mag-asawa.
Madalas, kapag higit sampung taon ang agwat ng edad ng magkarelasyon ay nagiging tampulan sila ng tukso o 'di kaya'y palaging napagtsitsismisan.
Ngunit tulad nga ng isinulat ng makatang si Francisco “Balagtas” Baltazar sa 'Florante at Laura,' ang pag-ibig ay makapangyarihan at kapag pumasok ito sa puso ninuman ay hahamakin ang lahat, masunod lamang ito.
Ganito nga ang nangyayari sa mga nag-iibigan na malaki ang agwat ng edad. Tila hindi na nila iniintindi kung anuman ang sabihin ng iba at mas nangigibabaw sa kanila ang kagustuhang ipaglaban ang kanilang pag-ibig.
Sa kasalukuyan, hindi na rin naman malaking isyu ang pag-iibigan ng dalawang tao na malaki ang tanda sa isa't isa o may malaking age gap.
Malaki na rin kasi ang ipinagbago ng lipunan sa pagdaan ng panahon. Mas malawak na ang pang-unawa ng mga tao at mas bukas na ang isip sa mga bagay na noon ay tila ipinagbabawal kahit wala naman talagang masama dito.
Sa Philippine showbiz, may mga ilan ding mag-asawa at magkasintahan na pinatunayang “age doesn't matter” pagdating sa pag-ibig.
Tila naging inspirasyon pa nga sila para sa ibang magkarelasyon na tulad nila ay malaki rin ang age gap.
Sila ang patunay na “love knows no boundaries,” maging sa edad. At hindi dapat maging hadlang ang malaking age gap para sa dalawang taong tunay na nagmamahalan.
Kilalanin ang mga showbiz couples na may malaking age gap sa gallery na ito.
Mas matanda ng 10 taon si Vilma Santos sa kanyang asawang si Ralph Recto
Ang tanda ni Jules Ledesma kay Assunta de Rossi ay 22 years. Ikinasal sila noong 2002 at ngayon ay may isang anak na babae, si Fiore.
Halos 19 years ang age gap nina Tonyboy Cojuangco at Gretchen Barretto. Mayroon silang isang anak, si Dominique.
Mas matanda si Robin Padilla ng 15 years kay Mariel Rodriguez. Nagkakakilala ang dalawa sa isang noontime show at may dalawang anak na.
May 15-year age gap sina Heart Evangelista at Chiz Escudero. Ikinasal sila noong February 15, 2015.
Mas bata ng 25 years si Hayden Kho sa asawa niyang si Vicki Belo. Mayroon silang isang anak, si Scarlet Snow Belo.
Hindi isyu ang 29-year age gap para kina Aiai Delas Alas at Gerald Sibayan
Sina Freddie Aguilar at ang asawa nitong si Jovie Albao ay may 44-year age gap.
Hindi hadlang sa kanilang pagmamahalan ang 27-year age gap nina Mommy Dionisia Pacquiao at ng kasintahan nitong si Michael Yamson.
Sinalubong ng aktres na si Cherry Lou ang 2021 kasama ang kanyang kasintahan at kapwa aktor na si Phytos Ramirez. 13 years ang age gap nilang magkasintahan. Ngayon ay mayroon na silang isang anak na pinangalanan nilang Caly.
Nagsimula lang sa isang tweet pero ngayon ay magkarelasyon na ang musikerong si Rico Blanco at ang aktres na si Maris Racal na may 24-year age gap. Mag-26 years old si Maris sa Setyembre, samantalang 50 years old si Rico.
Happily married na si Beauty Gonzalez sa art curator na si Norman Crisologo, na mas matanda ng 15 taon sa kanya.
Napaamin na sina Coco Martin at Julia Montes sa tunay na estado ng kanilang relasyon nang dumalo sa watch party ng 'Unbreak My Heart'. Sa isang ulat, ibinahagi nila na 12 years na silang magkasintahan. Labing-apat na taon ang agwat ng edad nina Coco at Julia.