Naniniwala si Aiai Delas Alas na “triumphant” siya ngayong taong 2024 dahil ipinanganak siya sa Year of the Wood Dragon.
Kaya naman kahit nakabase siya ngayong sa Amerika, sabi ng Comedy Queen na si Aiai, gagawa siya ng paraan para magpatuloy sa trabaho niya bilang artista rito sa Pilipinas.
“Kapag gusto mo naman, may paraan, e. So, magpapaalam ako sa lawyer ko na, 'Kailangan ko 'tong gawin, attorney, kasi triumphant ako this year,” sabi ni Aiai na may halong biro nang makausap siya ng GMANetwork.com at iba pang piling entertainment media kamakailan.
Bukod sa pagbabalik ng The Clash, tinanong ng GMANetwork.com kung ano pang mga proyekto ang gusto sana niyang gawin.
Sagot ni Aiai, “Gusto ko sanang gumawa ng Ang Tanging Ina: The Reunion.”
At dahil mas maluwag na ngayon ang TV networks pagdating sa collaborations, umaasa si Aiai na makasama ang ilang artista sa pelikulang ito kung sakaling matuloy.
Siyempre, ang isa sa mga gusto niyang makasama rito ang Kapuso actress at fashion icon na si Heart Evangelista, na gumanap bilang isa sa 12 niyang anak sa pelikula.
“Si Heart Evangelista kasi anak ko siya, number four ko siya, di ba?” sabi ni Aiai.
Bukod kay Heart, dagdag niya, “Sana makasama ko pa rin si Jiro [Manio].”
Matatandaan na isa ang batikang actress sa mga naunang tumulong sa dating child star para sa rehabilitation niya.
Ano kaya ang masasabi ni Aiai sa kalagayan ngayon ni Jiro?
“Sa totoo lang, happy ako sa kanya kasi parang okay siya ngayon. Pero siyempre, hindi naman ako na binenta niya ang Urian [award] niya. Pero siya, iba kasi yung noon, e. Ngayon, okay siya, tama ang pag-iisip niya, tama ang mga sinasabi niya sa mga interbyu. Happy ako na parang nakaka-recover na siya.”
Kamakailan lang ay naging laman ng entertainment news si Jiro dahil sa pagbebenta niya ng kanyang Gawad Urian Award sa collector na si Boss Toyo.
Tungkol dito, sabi ni Aiai sa huli, "Sana ma-recover ko yung Urian niya."
Samantala, tingnan dito ang ilang pa sa mga naging anak-anakan ni Aiai sa showbiz:
Special ang bonding ni Aiai kay Alden Richards na tinatawag niyang "Ashey." Pag-amin din ng Asia's Multimedia Star, nakahanap siya ng ina sa katauhan ng kanyang dating 'Sunday PinaSaya' co-star.
Si Marvin Agustin ang panganay na anak ni Aiai sa movie series na 'Ang Tanging Ina.'At kahit hindi na sila magkatrabaho ay nanatili ang pagiging close nila hanggang ngayon.
Nanatili ring malapit si Nikki Valdez kay Aiai. Siya ang gumanap na second child ng Philippine Queen of Comedy sa 'Ang Tanging Ina' movie series.
Kahit hindi nakabilang sa huling pelikula ng 'Ang Tanging Ina,' naging maayos pa rin ang relasyon nina Aiai at Heart dahil anak na ang pakikitungo niya rito.
Full support ang natanggap ni Carlo Aquino sa kanyang nanay-nanayan na si Aiai para sa kanyang pagbabalik-pelikula.
Dahil sa trabaho ay anak-anakan din ang turing ni Aiai kay Alwyn Uytingco.
Naging anak din ni Aiai si Serena Dalrymple sa 'Ang Tanging Ina' movie series.
Gumanap din si Shaina bilang anak ni Aiai sa pelikula.
Si Aiai ang nagsilbing nanay ni Ruru Madrid sa ilang Kapuso shows tulad ng 'Let The Love Begin' at 'Sherlock, Jr.'
Ang dating child star na si Jiro Manio ay ikasiyam na anak ni Aiai sa 'Ang Tanging Ina' film series kung saan gumanap siyang Samuel o "Shammy." Kahit pagkatapos ng pelikula ay patuloy pa rin ang komunikasyon ni Aiai sa aktor. Matatandaang nalulong si Jiro sa bawal na gamot at isa sa mga naunang tumulong sa kanyang magpa-rehab ang nanay-nanayan niyang si Aiai. Sa larawan, kasama nina Aiai at Jiro ang dalawang anak ng aktres na sina Sophia at Sancho.
Bukod sa 'Ang Tanging Ina,' bumida rin si Aiai sa isa pang iconic dramedy film na 'Ang Cute ng Ina Mo.' Sa pelikula, ginawa niya ang lahat para mapalapit sa nawalay na anak na si Christine sa Australyanong si Jack. Ang character na Christine ay ginampanan ni Anne Curtis. Hanggang ngayon ay sweet pa rin si Anne kay Aiai na kung tawagin niya ay "Inay."
Hanggang sa telebisyon ay kinagigiliwan si Aiai bilang ina. Sa bago niyang serye na 'Raising Mamay,' gaganap siyang Letty, ang adoptive mom ng teenager na si Abigail, na gagampanan ni Shayne Sava. Sa pagkakataong ito, kakaibang Aiai ang mapapanood ng viewers dahil magpapalit sila ng role ni Shayne. Mababaril si Letty na magreresulta sa traumatic brain injury na magiging cause ng age regression. Babalik sa pagkabata ang behavior ni Letty kaya aakalain niyang si Abigail ang kanyang ina dahil ito na ang tatayong guardian niiya.