Rocco Nacino, naghatid ng tulong sa mga nasalanta ng Bagyong Ulysses sa Marikina

Naghatid ng tulong ang actor/navy reservist na si Rocco Nacino sa mga nasalanta ng Typhoon Ulysses sa Provident Village, Marikina kamakailan.

Ang Marikina ay isa sa lubos na binaha dahil sa pag-apaw ng tubig sa Marikina River bunsod ng bagyo.

Nakipagtulungan si Rocco sa Philippine Navy, mga grupong Task Force Stars at Class Matatag, barangay officials sa Tañong, at maging sa dating guro ng Kapuso star para maisagawa ang relief operation.

Ang nalikom nilang donasyon na mula sa relief drive ni Rocco--Help From The Heart--ay pinambili nila ng balde, bigas, tsinelas, gamot, at pang-linis ng damit at bahay na ipamimigay sa mga residente ng Marikina na naapektuhan ng Typhoon Ulysses.

Nakipagkwentuhan din si Rocco, kasama ang kanyang fiancee na si Melissa Gohing, sa mga residente roon para magbigay-saya.

Bago ito, nakiisa si Rocco sa pamamahagi ng relief goods sa mga nasalanta ng bagyo sa Dela Costa 5, Rodriguez, Rizal noong November 15.