Nawindang ang isang ina nang malaman niya na may paparating na 60 parcels sa kanilang bahay na nagkakahalaga ng P20,000. Ang umorder ng mga produkto via online, ang anak pala niya na dalawang-taong-gulang.
Sa kuwentong "Dapat Alam Mo!" ni JP Soriano, sinabing buong akala ng stay-at home mom na si Denzen Manliguez, 27-anyos, na naglalaro o nanonood lang sa kaniyang cellphone ang anak niyang si Denise.
Pero ang hindi niya alam, nag-o-online shopping na pala ang bata sa app na nakalagay sa kaniyang cellphone.
"Pang-baby po lahat eh, 'yung mga naka-add to cart sa akin. Tapos may mga crop top, may mga gamit din po sa bahay. Nagulat po ako, kasi wala po akong pambayad lahat nu'n eh," sabi ni Manliguez.
Dahil dito, isa-isang kinausap ni Manliguez ang sellers, at nagpaliwanag siya sa nangyari sa bawat dumadating na rider.
"Nakiusap na lang po ako po ako kay rider. Tapos hiningian lang po ako ng ID. Tsaka aware na rin po ang mga rider kasi nakita po nila sa Facebook," sabi ni Manliguez.
Sa kaniyang social media post, pabirong sinabi ni Manliguez na gusto na niyang ibenta ang kaniyang anak dahil sa pagiging "paladesisyon" nito.
"Sinabihan ko lang po siya, hindi ko po siya pinagalitan kasi hindi niya naman po alam 'yun eh," sabi ni Manliguez.
Dahil sa nangyari, hindi muna ipinapagamit ni Manliguez ng cellphone sa kaniyang anak, at binura na rin niya ang app.
Ayon sa IT professional na si Anjay Ruff Lim, batay sa datos mula sa childnet.com, isa sa 10 bata ang nakaranas na aksidenteng bumili sa online.
Samantala, anim sa 10 mga bata naman ang nakabili sa online sa pamamagitan ng phone, shopping apps, o dahil sa mga laro.
Papaano na nga magagawang "child proof" ang cellphones upang maiwasan ang katulad na insidente? Tunghayan ang tips sa video ng Dapat Alam Mo! --FRJ, GMA News
