Naging instant milyonaryo ang isang Pinoy janitor sa Canada nang tumama siya ng $7 milyon sa tinayaan niyang Lotto 6/49.
Sa pahayag ng British Columbia Lottery Corporation (BCLC), sinabing biglang nagbago ang buhay ni Vito Halasan noong Abril 27, 2019, nang tumaya siya at nanalo sa lotto, ilang araw matapos niyang ipagdiwang ang kaniyang ika-58 na kaarawan.
Napag-alaman na naninirahan sa Surrey si Halasan, at lumipat sa Canada sampung taon na ang nakalilipas.
"I remember scanning my ticket and seeing all these numbers,” sabi ni Halasan. "I have really blurry vision so I had to hold the ticket right up to my face. I couldn’t believe it."
Matapos na malaman na nanalo siya, kaagad daw niyang tinawagan ang kaniyang anak na hindi raw kaagad naniwala.
Sinabi ni Halasan na lagi siyang tumataya sa lotto at ang kaniyang dahilan, "so I can dream."
"I dream of being able to take care of my kids and make their future better," aniya. "Now we’ll be able to buy a nice house for my children and grandchildren." —FRJ, GMA News
