Pinay sa UAE, tatanggap ng higit P387,000 bawat buwan sa loob ng 25 taon

Laking suwerte ng isang Pinay sa United Arab Emirates matapos manalo sa FAST5 draw.

Ayon sa Emirates Draw sa Facebook, nanalo si Freilyn Angob ng monthly payout na 25,000 dirhams o katumbas ng mahigit P387,000 sa susunod na 25 taon.

Idinagdag ng Emirates Draw, na nakuha ni Angob ang second grand prize sa FAST5 draw kung saan pumipili ng limang numero ang manlalaro mula sa kabuuang 42 numero.

"We were planning to get married, but my financial condition did not help. This win will end all my worries and give me financial security for a long time," sabi ni Angob sa website ng Emirates Draw.

"I will never forget that moment. I thought to myself again, maybe I won a small cash prize. But when I received the congratulatory email mentioning that I won the Grand Prize, me and my fiancé jumped from joy," dagdag niya.

Sampung taon nang naninirahan at nagtatrabaho sa UAE ang 32-anyos na si Angob.

Mula sa pagiging dental nurse, nagpatuloy siya pag-aaral para maging laser technician. —FRJ, GMA Integrated News