Bataan road trip sa 'Biyahe ni Drew'

Biyahe ni Drew:  Bataan Road Trip
Biyernes, April 25
8 pm sa GMA News TV
 
Sa Biyernes, samahan si Biyahero Drew Arellano sa kaniyang summer road trip papunta sa isa sa pinakasikat na destinasyon sa Gitnang Luzon—ang Bataan!
 
141 kilometers ang layo ng Bataan sa Maynila kaya maglaan ng tatlong oras para sa biyahe.  Ang good news, mas mabilis na ngayon ang biyahe dahil bagong gawa ang North Luzon Expressway o NLEX at Subic-Clark-Tarlac Expressway!


Espesyal ang pagpunta ng ating biyahero dahil meron pa siyang travel escort—ang Bataan Mountain Bikers. Ang kanilang unang stopover, ang Vietnamese Village sa Morong Special Economic Zone o MSEZ. Dating tinawag na tahanan ng mga Vietnamese, Laoasian at Cambodian refugees ang MSEZ. Pero ngayong isinara na ang refugee processing center, isa na itong resort kung saan pwedeng magbakasyon kahit sino.
 
Ilang padyak lang mula sa Vietnamese Village, kakaibang food trip naman ang susubukan ni Drew sa Loleng’s Hutieu-An kung saan pwede kang magpakabusog sa authentic Vietnamese food! Mula Banh Mi na traditional Vietnamese sandwhich, hanggang Hu-Tieu o noodle soup, meron dito. Ang nakakatuwa, Pinoy na Pinoy ang may-ari ng restaurant na ito.

Samantala relaxation ang habol ni Biyahero Drew sa Vista Venice Resort. Ang Volcanic Spa kasi ng resort ay garantisadong tutunaw daw ng sakit ng kalamnan lalo na matapos ang mahabang biyahe.

Para naman sa mga history buff,  maraming makasaysayang lugar na pwedeng puntahan. Nariyan ang Dambana ng Kagitingan o Shrine of Valor na itinayo noong 1970 bilang parangal sa mga magigiting na sundalong Pililpino nong World War II.

Ang Mt. Samat Cross naman na may taas na 92 meters o halos tatlumpung palapag ay  katumbas daw sa laki ang Statue of Liberty ng New York. Pwede ring bisitahin ang Bagac Death March Km 00 marker kung saan sinasabing nagsimula ang madugong Bataan Death March.

Dadaanan din ni Drew ang Las Casas Filipinas de Azucar, isang resort kung saan matatagpuan ang mga lumang bahay na binili, inayos at inilipat dito para makabuo ng isang kakaibang komunidad.
 
And what better way to cap off the trip than to have a little adventure. Sa Mt. Samat Treetop Adventure,  makapigil-hininga ang  zipline nito na may habang  540 meters! Sa Wetland and Nature Park sa Balanga City naman, biking, kayaking, boating at bird-watching ang pwedeng subukan ng buong pamilya.
 
Sama na sa Biyahe ni Drew sa Biyernes, 8PM sa GMA News TV.