Full Transcript: Chiz Escudero on 'Kandidato 2013'

Senator Chiz Escudero officially started his political career when he got elected as the representative of the First District of Sorsogon in 1998, but his popularity rose when he became the spokesperson of the late Fernado Poe Jr. during the presidential elections in 2004.

The incumbent senator is now running for his second term, and is also among the leading senatorial candidates in recent public surveys. In his interview for the GMA News and Public Affairs’ special election series “Kandidato 2013,” he answered Arnold Clavio and Howie Severino’s questions regarding his endorsement of VP Binay, his relationship with Kapuso actress Heart Evangelista, and his existing product endorsements.

Here’s the full transcript on his interview on “Kandidato 2013.”

-

ARNOLD CLAVIO (AC): Magandang gabi, mga Kapuso. Ang makakasama nating kandidato ngayong gabi, Senator Chiz Escudero. Senator, magandang gabi po.

CHIZ ESCUDERO (CE): Igan, Howie, sa ating mga televiewers, magandang gabi ho sa inyo.


On his party alliances

AC: Ano na ho ang latest sa pag-aagawan sa iyo ng UNA at ng Team PNoy? Maayos na ba o talaga bang binalaan ka?

CE: Hindi kami nagkausap ng personal pero mukhang paniniwala ko, maliit na bagay ito at malayo sa mga isyu at plataporma ng mga kandidato na dapat pag-usapan.

AC: So magpapadala ka ng proxy na lang?

CE: Bawal raw, bawal.

AC: Bawal ba? So may aasahan ‘yung mga dadalo sa kampanya ng UNA na makikita ka nila?

CE: Well, magkikita-kita rin siguro kami sa kampanya. ‘Di ko lang matiyak kung kailan.

On being an independent candidate

HOWIE SEVERINO (HS): Para sa inyo, ano ba ang ibig sabihin ng pagiging isang independent candidate?

CE: Wala kang kinabibilangang partido at hindi ka tali sa ano mang posisyon o desisyon o commitments ng mga lider ng partido dala ang kanilang mga miyembro.

HS: Well, at the same time parang ang dating sa iba ‘yung pagiging common candidate ng dalawang coalition, parang you want to have your cake and eat it too.

CE: Well Howie, politics is a mission. Sino ba naman ang isang kandidato para sabihin sa nag-aalok ng tulong na hindi ko kailangan ang tulong mo. Siyempre, anumang tulong na binibigay at inaalok, siyempre malaking bagay ‘yun at tulong sa aming kampanya. But let me clarify, maliban sa UNA at LP, in-adopt din ng Makabayan at Centris Democratic Party ang kandidatura ko at ni Grace Poe, kung ‘di ako nagkakamali, kaugnay ng eleksyon na darating.

HS: Pero itong dalawang major coalitions, dahil kayo ay isang common candidate, ‘di n’yo ba naisip na magiging inevitable nga, magkakaroon ng kaunting sama ng loob?

CE: Hindi, dahil ginawa na nila noon ito, in-adopt ni President Estrada si Senator Santiago na nasa linyado ni Pangulong Arroyo. In-adopt din nila si Senator Revilla na nasa linyado ni Pangulong Arroyo at hindi naging isyu ang pag-a-attend-attend ng rally nung panahon na ‘yun.

HS: Bakit ngayon naging isyu po?

CE: Siguro mas maganda sila sumagot n’on at hindi manggaling sa akin.

AC: Mahirap ba ang midterm election o parang sinisisiw mo lang?

CE: ‘Pag midterm election din kami noon nung tumakbo kami, 2007. Ang pagkakaiba lang ngayon, kakampi namin ang pangulong nakaupo ngayon kumpara dati na hindi lamang hindi kakampi, kalaban pa at kinakalaban namin ang pangulong nakaupo noon.

AC: So ano ka ba talaga?

CE: Tao po.

AC: Administrasyon? Oposisyon? O –

CE: Administrasyon.

AC: Pero ang UNA?

CE: Maganda rin siguro sagutin nila ‘yun dahil ayon sa nababasa ko at napapakinggan ko, administrasyon din daw naman sila sapagkat hindi sila oposisyon, subalit nagbibigay sila ng pagpuna kapag may nakikita silang pagkakamali.

On his 2010 endorsement of VP Binay

AC: Hindi ka ba nahihiya na si Vice President Jojo Binay na inendorso mo nung 2010 ay hinahanap-hanap ka rin sa kabila?

CE: Hindi sa nahihiya, hindi sa hindi nahihiya, pero naguguluhan dahil maliwanag ang usapan nung bago magsimula ang kampanyahan. Bago magsimula ang rally, ang ganda ng usapan. Nagulat na lang ako sa mga binitiwang salita nila pagkatapos nung rally. In fact, nung 2007 at 2010, ganitong klaseng kampanya ang ginawa ko at pinayo ko ring gawin ng mga kandidatong tinulungan ko at naniniwala akong nakatulong naman ‘yun, maski papano. Kaya hindi ko makita ‘yung rason kung bakit isyu ito at bakit ganitong klaseng pangangampanya, makabagong pangangampanya, ang ginagamit ngayon.

AC: Ano ‘to, plus factor o negative sa kampanya mo?

CE: Alin?

AC: ‘Yung ganitong maliit na isyu na pinapalaki?

CE: Ano mang mudslinging, ano mang batuhan ng putik, hindi maganda para sa isang kampanya at nadi-distract lang ang mga tao sa dapat pag-usapan na isyu at plataporma.

On his legislative agenda

AC: Sa paghingi mo ng bagong mandato, meron ka bang mga bagong isusulong o dati mo nang naging legislative agenda? Ano ba talaga ang pangunahing ano mo –

CE: Dati na may kinalaman sa edukasyon, hustisya, at kalusugan. Dagdag pa siguro doon ang mga programa sa imprastruktura kung saan namin binubuhos ang aming PDAF nitong mga nagdaang taon.

AC: Ipagpapatuloy mo lang ‘yun?

CE: Ang kaibahan lang siguro, kung public markets namin inubos lahat ng munisipyo ang aming PDAF, school buildings naman siguro ang aming pagtutuunan ng pansin sa susunod na termino.

On political dynasties

HS: Senator, sa palagay ninyo, miyembro ba kayo ng isang political dynasty?

CE: Ayon sa generic na depenisyon, medyo oo, dahil tatay ko, dating congressman ng unang distrito ng Sorsogon bagaman hindi na s’ya nakaupo nung ako ay tumakbo. Dalawang taon bago ako tumakbo, hindi na s’ya kongresista dahil in-appoint s’ya, hinirang siya ni Pangulong Ramos bilang secretary ng Agriculture Department nung 1996. Meron kaming ilang mga kamag-anak na humawak ng pwesto noon sa aming probinsya, bagaman matagal kaming nawala sa aming probinsya. Halimbawa, ‘yung lolo ko sa tuhod, great grandfather ko, gobernador ng Sorsogon nung panahon ng giyera. World War II. Mula noon hanggang 1980’s, walang umupo o naging opisyal na Escudero sa aming lalawigan. Muli lamang tumakbo ang tatay ko 1984 na sa interim Batasang Pambansa.

HS: So you think you should be covered by the constitutional ban?

CE: At that time, probably yes. But as a senator, no. Ito na yata ang pinakamataas na posisyon na narating ng aming pamilya sa paninilbihan sa pamahalaan at pumanaw na rin ang tatay ko.

HS: So sa ngayon, hindi s’ya dapat mag-apply sa inyo kung sakaling magkaroon ng batas?

CE: Hindi. Sa aking pagtakbo bilang senador.

HS: So itong pangarap na magkaroon ng batas ukol sa political dynasty ban, sa tingin n’yo ba realistic ito? Kasi, I mean, why would congressmen like you legislate themselves out of politics?

CE: It's not so much in legislating ourselves or themselves in office. May prinsipyo rin namang nasa likod noon. Halimbawa, ang mga pinakamodernong demokrasya sa buong mundo, kabilang na ang America at United Kingdom, wala ‘kong nalalamang anti-dynasty bill nila. Buong nagtiwalang binibigay nila sa kanilang botante para piliin kung sino ang gusto nilang iluklok sa pwesto. ‘Ni wala nga silang term limits, binibigay nila sa kamay ng kanilang mamayan ang pagpasya kung asawa, anak, kapatid, kapitbahay o hindi kaano-ano ang kanilang muling ibobotong pumalit doon sa dating nakaupo. Marahil wala pa tayo sa lebel at antas na ‘yun, pero naniniwala ako dapat, at sooner or later, darating tayo sa lebel at antas na ‘yun kung saan may buo at malaki ang tiwala natin sa ating mga mamamayan na magdesisyon para sa mga sarili nila at hindi para sa ilan na matatalino at nakapag-aral o may magandang  intensyon na diktahan sila  kung sino ang pwede at sino ang hindi nila pwedeng iboto.

On his product endorsements

AC: Nasubaybayan ko ‘yung political career mo, Senator, at nitong after 2010, hindi ka gaanong napapansin sa senado. Although tumatayo ka rin at naninindigan, pero nitong mga huling panahon, nakita ka namang nag-endorso ng malunggay, meat products. Nag-host ka pa sa telebisyon. Ano ba ‘to? Sadya ba ‘to para early campaign o nagkataon lang?

CE: Hindi namin hiniling o plinano ‘yun. Halimbawa, ‘yung sa TV hosting, niyaya kami at bakit hindi? Magandang karanasan at may mami-meet ka pang iba’t ibang tao sa larangan ng showbiz na labas sa mundong ginagalawan ko, na iniidolo ng marami at iniidolo ko rin bilang manonood. ‘Yung ibang produkto, either pakiusap ng kaibigan o dagdag kita na rin nang sa ganon ay masuportahan ang mga personal na kailangan natin, labas sa gastusin namin sa pamahalaan.

AC: Saan napupunta ‘yung kita mo sa endorsements?

CE: Hindi lahat meron dahil ‘yung iba doon libre.

AC: Pero nakalamang ka sa ibang kandidato sa exposure mo.

CE: Oo at hindi, dahil may nagsasabing hindi bagay. May naiinis. 50-50 ‘yun. Plus at minus palagi ‘yun. Pero para sa akin, saan napunta, ano mang kinikita ko sa ganyan, sa mga ganyang bagay, sa akin ‘yun at sa pamilya ko ‘yun, sa mga anak ko ‘yun, at hindi ko ginagastos ‘yun para sa politika.

HS: Ito namang kaugnay ng commercial endorsements, wala ba kayong nakikitang potential conflict of interest d’yan dahil lahat ng commercial interests ay apektado ng legislation at public policy?

CE: Hindi lahat. Merong oo, pero hindi pa ako naka-engwentro. Halimbawa, ‘yung malunggay, wala pa naman kaming pinag-usapan na batas o bill kauganay n’ya. Naunang maipasa ang cheaper medicines billl na hindi pa kami kasama o bahagi ng produktong yan.

HS: Pero kung sakaling magkaroon ng bill about malunggay, wouldn't you have to inhibit yourself?

CE: Kinakailangang ideklara namin ‘yung conflict of interest at mag-inhibit kami doon sa panukalang batas na ‘yun.

HS: Paano kung dumami nga ng dumami ‘yung mga endorsements mo na ‘yun? ‘Di palagi kayong mag-i-inhibit ngayon sa mga proceedings sa senado?

CE: Hindi naman siguro, hindi pa pinag-usapan at wala pang bill na tinalakay tungkol sa hotdog at sa tingin ko, sa darating na termino, walang bill na pag-uusapan tungkol doon. Kung meron man, obligado kami sang-ayon sa konstitusyon na ideklara ang conflict of interest at mag-inhibit kami maliban na lang kung boboto kami laban sa interes namin. Pero kung klaro kang boboto sa interes mo, obligado at kailangan ka mag-inhibit, otherwise subject to an ethics complaint ang gagawin mong aksyon. Kaugnay ng mga karagdagang produkto, hindi siguro mangyayari ‘yun. Malayo ang antas at lebel ng mga numero unong endorsers sa ngayon kaugnay ng mga produktong ine-endorse nila sa kasalukuyang kalagayan ko.

On his interest in a showbiz career

AC: So anong mas matimbang sa ‘yo ngayon, politika o showbiz?

CE: Pwede ba none of the above? Ayoko rin naman kainin ng agahan, tanghalian, at hapunan ang politika. Siguro sinusubukan ko lahat nang sa ganon, handa ka kung ano man ang mangyari sa ‘yo. Mahirap naman, Igan, na kapit tuko ka sa pwesto mo dahil wala kang ibang alam gawin. Takot ka mawala ‘yun sa ‘yo dahil wala kang ibang pwedeng gawin.

AC: So pwedeng sabihin na pagdating ng panahon, pwedeng maging leading man ka rin?

CE: Hindi ako papasok sa pelikula. Iba ‘yung showbiz sa pelikula. Hindi ako marunong umarte. Babalik ako sa pagtuturo at kung may pagkakataon na magkaroon ng programa, bakit hindi?

On his presidential ambitions

AC: So ‘yung ambisyon mo sa pagka-pangulo wala na?

CE: Darating ‘yun. Hayaan na lang muna natin ‘yun. Wala akong karapatang pag-isipan ang 2016 dahil hinaharap ko ang halalan sa 2013. ‘Yung iba siguro, sina Vice President Binay, Senator Estrada, Senator Revilla, sila pwede siguro nilang isipin ‘yan dahil wala naman silang eleksyon ngayong 2013.

AC: Linawin lang natin ‘yan. Ano ba talaga nangyari? Kasi nasa frontline ka nung 2010. Bakit biglang… anong nangyari, Senator?

CE: Maliwanag na pagpapasya ‘yun na hindi pa napapanahon at hindi pa tamang panahon para sumuong at kumandidato bilang pangulo ng bansa.

HS: Kasi ‘yung kumakalat na, at least chismis, na na-disappoint kayo, sa you were expecting help financially at hindi dumating ‘yung tulong na ‘yun financially. Anong katotohanan?

CE: Unfair ‘yang lumalabas na ‘yan, Howie. Hindi porke’t wala akong pera, mukha akong pera. Hindi porke’t wala akong pera, hinahanap ko lagi ‘yung pera sa ibang tao. Mayayaman lang marahil ang pwedeng magsabi n’on at magmamalaki tungkol d’yan. Hindi ko pera ‘yun para angkinin. Hindi ko pera ‘yun para ikasama ng loob ko na hindi ibibigay sa akin. Hindi ‘yun ang naging dahilan. Sa simpleng pananalita gaya ng nasabi ko, hindi ko panahon ‘yun. At kung sumabak ako, maraming mga kasama na masusubo, na mga kasama at kaibigan ko samantalang hindi naman ako naniniwala sa kaibuturan ng puso ko na kaya naming makamit ang tagumpay. Unfair sa mga sumusuporta sa amin na itataya ‘yung kinabukasan nila, oras nila, pera nila at buhay nila sa isang bagay na ako mismo hindi naniniwalang kaya naming makamit.

HS: So financial support was officially not the reason?

CE: Isa ‘yun sa mga bagay-bagay, kasi kung may numero ka naman darating at darating ‘yun. Kung wala kang numero, kahit gaano karaming pera meron ka, balewala lang ‘yun. Masusunog lang ‘yun.

On his personal life

AC: Okay, Senator, naging makulay ang personal mong buhay. So ang tanong ko, dapat ba ang publiko panghimasukan ‘yung personal mong buhay o tingnan na lang talaga ‘yung trabaho mo sa senado?

CE: Sana hindi. Sana hindi nila pakialaman at panghimasukan ang personal kong buhay. Sino ba naman ang may gusto n’on?  Kahit siguro ikaw, Igan, kahit siguro ikaw, Howie, bagaman publiko kayong figures, nakikita kayo lagi sa telebisyon at radio, siguro ayaw n’yo rin namang pinapakialaman ‘yung personal n’yong buhay. Ganon din naman ako. Maski pampubliko ang aking trabaho, mas ninanais at gusto ko, wag pakialaman ang personal kong buhay.

AC: So ‘wag nating panghimasukan. So ano ‘yung nagbibigay saya sayo ngayon?

CE: Mga anak ko.

On his relationship with Heart Evangelista

AC: So sabihin na natin na nagkaroon ka ng failed marriage, ano? Naging maingat ka na ba ngayon, ngayon na alam naman ng lahat at open naman ang relationship mo sa Kapuso naming si Heart Evangelista? Naging maingat ka ngayon na bigyan ulit ng panagalawang pagkakataon ang married life?

CE: Hindi ako naging jaded o hindi nasira ang pananaw o paniniwala ko sa dambana ng kasalan o kasal dahil sa nangyari sa akin. Unfair din namang sabihin na magiging maingat at nag-iingat ako ngayon. Hindi ba, Igan, ‘pag umibig ka, pikit-mata at wala kang kinatatakutan. Tumalon ka man sa ika-dalawampung palapag, gagawin mo. Ganon din siguro. Unfair na magiging maingat kung tunay kang nagmamahal at tunay mong minamahal ‘yung iyong kasama.

HS: Si Heart ba, may role sa campaign? Tutulong ba s’ya sa ‘yo?

CE: Wala. Pinag-usapan na namin ‘yun. Sabi nga nila, Heart-less campaign daw ang gagawin ko.

HS: Does she give you advice?

CE: No.

HS: Like how you dress, how you –

AC: S’ya ba stylist mo?

CE: May mga naririnig akong ganon paminsan-minsan, pero hindi ko naman palaging sinusunod kasi hindi ko naman kayang panindigan.

AC: Bakit, nabaduyan ba s’ya sa ‘yo minsan?

CE: Hindi naman. Pag-improve lang. Kasi mas safe ako, conservative. Hindi ako naglilihis doon kasi hindi ko alam kung anong bagay. So minsan, may pinapasubok s’ya sa akin na hindi ko naman kayang panindigan.

AC: Bakit nga ‘yung ibang kandidato, gusto nila may celebrity endorser sila? Ikaw, girlfriend mo, so libre na ‘yun sa gastos, bakit mo hinayaan na ganon?

CE: Prinsipyo siguro, gawa ng sabi ko hiwalay ang trabaho sa personal. Ayokong mabahiran ‘yung relasyon namin sa ano mang alinlangan, duda, o pintas nino man, na kaya lang kami magkasama o nagsasama dahil sa interes pampulitika. Kung magkakatuluyan man kami, sana ‘yun ang kahitnan. Pero kung magkakatuluyan man kami ayokong ang pinagsimulan ay ganito.

AC: Sana? Nag-propose ka na?

CE: Hayaan mo s’ya na munang makaalam, Igan, bago ikaw.

AC: ‘Kala ko s’ya muna magpropose. Pero kahit papano ganado ka.

CE: Hindi maikakaila. S’yempre sino man.

AC: Malayo nung nakita kita nung 2010.

CE: Sino mang umiibig malayong, sino mang umiibig. S’yempre makulay ang mundo at mas palangiti kesa nakasimangot.

On the recent controvery regarding Senators' MOOE

AC: Okay, ‘yung kontrobersya na pinasok ng senado na nag-away-away dahil sa pera. Habang nandoon ka ba at nakikinig, nahihiya ka ba sa publiko at nangyari ‘yun?

CE: Wala ako doon, Igan. Actually, nung nagbabangayan sila tungkol sa pera, kasalukuyang nagba-bicam kami sa Marcos Compensation Bill noon. Nalaman ko na lang nung pagdating ko sa floor na nagkaroon pala ng bangayan. ‘Ni hindi namin alam na nangyari ‘yun. Kapiling at kasama ko noon si Senator Arroyo at si Senator Guingona kaya hindi namin alam ‘yung nangyayari sa floor nung mga panahon na ‘yun.

AC: Pero nabalitaan mo pa rin.

CE: Pagkatapos. Pero, at least, hindi ko kailangan matunaw sa kinatatayuan ko sa floor habang nagyayari ‘yun.

AC: Bakit? Hindi mo ba masikmura ‘yun?

CE: Sa loob o labas man ng senado, kahit siguro personal na usapan sa pagitan ng mga magkakaibigan at magkakamag-anak, hindi naman siguro dapat pinag-aawayan ang pera.

AC: So ikaw, isa ka sa mga nakatanggap ng P1.6 million, tama ba? Saan mo ginamit naman ‘yung PDAF na ‘yun o MOOE?

CE: For public use and for public purpose ‘yun. Nilagay namin sa account namin sa opisina at ‘yun ‘yung revolving fund ng opisina. Hindi ko kayang sabihin kung saan diretso dahil at the end of the year, magbabalik kami ng sobra. For example, last year nagbalik kami ng kulang-kulang two million na sobra sa pondo namin dahil ‘di namin nagamit. So ‘yung binibigay na pondo, ‘yun ang ginagastos sa susunod na buwan. ‘Yung sobra, ike-carry over sa susunod na buwan. Pagdating ng taon, pag may sobra pa rin, isasauli ‘yun.

AC: So kailangan palitan ‘yung certification? Gusto mo resibo na para mas detalyado?

CE: Pabor kami doon at handa kami doon sa liquidation, Igan. Mula pa dati. Actually, ganon na ginagawa namin kasi sooner or later, mangyayari't mangyayari yan. Tsaka ginagawa naman namin yan. Ginagastos din namin sa public use at public purpose, ‘di itago mo na lang lahat. May staff naman na gagawa n’on para sa ‘yo.

HS: Sa palagay n’yo, paano naapektuhan ‘yung reputasyon ng senado sa bangayan na ito at sabi pa nga ni Senator Santiago at Senator Enrile, bumaba na sa lebel ng gutter ‘yung debate ano?

CE: Well, sa dalawang aspeto naapektuhan sa palagay ko ang senado. Una, nabawasan, ayokong isiping naalis, ‘yung moral basis ng senado na mag-imbestiga kung kami mismo ay dapat palang imbestigahan. Pangalawa, apektado rin ang senado dahil sa inasta at mga salitang ginamit ng mga indibidwal na senador na pwede naman siguro sa labas na lang ng senado nangyari at ginawa ‘yun, pero sa kasawiang palad, sa loob ng senado mismo. Sa oras ng senado at sa floor ng senado nagamit at ginamit ‘yung mga salitang ‘yun.

On his ranking in election surveys

AC: Sa mga survey, maganda ‘yung posisyon mo. Kampante ka ba o medyo nakikita mo rin ‘yung ibang istratehiya para tingnan itong mga figures na ito?

CE: Isa ako sa mga naniniwala sa survey, Igan. Mula pa nung mababa ako sa survey. Liwanagin ko lang, nung una akong tumakbo sa pagka-senador noong 2007, number 18 ako. Nagsimula nung unang ni-rate ng mga survey companies at unti-unti naming trinabaho at nagtrabaho patungo sa mas mataas-taas na numero. Turo sa akin ng tatay ko, sa lahat ng eleksyong hinarap ko mula noong 1998, dapat laging running scared ka. Kailanman hindi dapat magkumpiyansa at dapat wala kang iiwanang, ‘ika nga, bato na hindi mo binabaliktad para tingnan kung ano pa ‘yung pwede mong magawa o gawin. Para sa dulo, ano man ‘yung resulta, pwede mong sabihing ginawa mo lahat. kung ganyan talaga, wala kang magagawa.

AC: Wala bang nape-pressure ka na pang-number two ka lang kay Senator Loren Legarda?

CE: Pilit mang sinasabi sa akin ‘yan, pero hindi. Ang pananaw ko pareho pa rin tulad ng dati. One o twelve man, pareho rin ang sweldo. One o twelve man, six years din ang term. One o twelve man, senador din ang tawag.

On his stand on divorce

HS: Senator, you are formerly annulled from your marriage. But tumututol naman kayo sa divorce. Wouldn't divorce make it, I don't know…

AC: Mas madali.

HS: Cleaner? Or it would be more fair for the couple, rather than an annulment. Kasi sa annulment, ‘di ba kailangan i-justify ‘yung psychological incapacity kumbaga nagkakaroon ng stigma ‘yung mag-asawa?

CE: Ang pagkakapareho muna ng divorce at annulment. Napapawalang-bisa ‘yung kasal at pwede na ulit mag-asawa ‘yung parehong partido. Ang pagkakaiba ng divorce sa annulment, ang annulment maliban sa psychological incapacity, ang annulment dapat ‘yung rason, basehan at dahilan ay nangyari naganap at nadoon na nung kinasal kayo. Sa diborsyo, pwedeng wala ‘yun nung kinasal kayo at nangyari o lumabas na lamang pagkatapos kayong ikasal. ‘Yun ang malaking pagkakaiba nun. Halimbawa, pambubugbog ng asawa. Hindi sya ground for annulment. Ground s’ya for divorce sa ibang bansa hindi ko alam kung isa s’ya sa mga proposed grounds for divorce nila dito sa Pilipinas. ‘Yun ang malaking pagkakaiba kaya medyo mas mahirap pa rin kompara sa ibang bansa kasi kailangan mong patunayan kung ano man ‘yung rason n’yo, nandoon na nung kinasal kayo.

HS: So why do you oppose divorce?

CE: Sa pananaw at palagay ko kasi, hindi pa handa ang ating bansa sa ganong uri ng proseso na mapawalang-bisa ang kasal ng ganon kadali o kababaw na lamang tulad ng incompatibility. Isa ‘yan sa mga pinapanukala nila at hindi naman siguro dapat ganon kadali ‘yun. Sa kultura at kasaysayan natin, hindi pa tayo handa doon. mas pabor ako, mas gawing affordable at accessible ang annullment sa pamamagitan ng pagbubukas ng PAO ng pintuan nila na tumanggap ng mga kaso ng annullment at magbigay ng libreng psychologist ang DOH o DSWD para sa mga kasong ganito.

HS: So halimbawa, ‘yung scenario na pambubugbog, hindi ba ‘yun sapat na dahilan para magkaroon ng divorce? Bakit ho nagiging mababaw na dahilan?

CE: Hindi s’ya mababaw na dahilan pero dahilan s’ya ngayon sa ilalim ng batas ng legal separation para paghiwalayin kayo, para hindi na maipagpatuloy ang pananakit na ginagawa sa babae man o sa lalaki. Pero hindi s’ya ground na muli kang magpakasal ulit. Dahil tinatanong ko nga ‘yung mga advocates ng divorce, kung pambubugbog ‘yung gagawin mong ground, maliban na lang kung ilalagay mo sa batas na ‘yung guilty spouse bawal na magpakasal binibigyan mo lamang ng panibagong pagkakataon ‘yung nambubugbog na magpakasal ulit at maghanap na naman ng iba na sasaktan na naman. Sa kasalukuyan, binibigyan ng batas ng karapatan ang sino mang esposang binubugbog na makipaghiwalay sa kanya, pero hindi s’ya binibigyan ng karapatan na muling magpakasal.

HS: Pero we are either the last country or one of the last countries na walang divorce law, pero sabi n’yo, hindi pa tayo handa. Hindi kaya naiiwanan na tayo ng mundo?

CE: Well kung tungkol naman siguro sa diborsyo, magandang maiwanan. ‘Wag tayong magpaiwan sa larangan ng ekonomiya at pagganda ng ating ekonomiya pero sa larangang ‘yan, hindi naman siguro ‘yan karera na unahan na marating at makarating sa puntong ‘yun.

HS: Pero bakit hindi pa tayo handa?

CE: Tingnan mo na lamang ang debate at usapan. Ang pinag-uusapan pa nga lang natin condom, halos hati na ang buong bansa. Hindi siguro tama na segundahan ‘yan agad-agad ng ganito naming panukalang batas. Pero to be fair, I am not aware of any bill that's pending in the Senate on divorce. ‘Di ba maraming nagsasabi. ang susunod na aaprubahan ng kongreso ay ito? ‘Ni wala hong pending bill sa Senado on divorce. Meron alam ako sa House pero wala pa senado.

On Reproductive Health Law

AC: Kasama pa rin sa isyung pampamilya ‘yung Reproductive Health Bill. Kontrobersyal pa rin ang simbahan hanggang sa kampanya. Hindi yata sila mag-e-endorso ng mga bumotong pabor sa RH Bill. May nakikita ka bang epekto noon sa kampanya n’yo?

CE: Meron palagi. Subalit ‘yun ang paninindigan at paniniwala ko. Bumoto ako pabor sa RH Bill. Wala namang pinapangalanang kandidato ang simbahan. Nagbibigay lang ng giya at sana kung meron mang mga pamantayan o may mga pagkakampanya man pabor o laban sa isang partikular na kandidato, wala silang suot na sutana at sana hindi sa pulpito.

AC: Ano ‘yung meron ‘yung RH Bill na nakuha ‘yung boto mo?

CE: Noon pa man, binibigyan nito ng malawak na karapatan at pagkilala ang ilan sa mga karapatan, hindi lamang ng mga kababaihan, kundi ng mga pamilya na ibigay sa kanila ng gobyerno ang kinailangan nilang serbisyo at kaalaman na gusto nilang malaman at kailangan nilang makuha. Bagaman wala silang pera pambili non, pagkakataon ang ibinibigay sa kanila dahil walang pwersahan ang bill na ito, kung ayaw mo, kung taliwas sa paniniwala mo, hindi ka obligadong gawin o sundin o may kunin na serbisyo mula sa gobyerno kaugnay ng RH Bill.

On his political plans

AC: Sa national ano, sabi mo kanina hayaan na lang muna ‘yung ambisyon mo sa pagiging pangulo. Bawasan pa natin, liitan pa natin. ‘Yung ambisyon mong maging Senate President.

CE: Wala. ‘Yun kaya kong sabihin ng tahasan, wala.

AC: Hindi ka ba charismatic sa mga kasama mo sa senado?

CE: Hindi ‘yun ang punto. Wala akong plano mula pa ako’y naging congressman, speaker, although ako’y naging senator na maging senate president.

AC: Ano ba ang batayan? Kailangan ba senior senator ka? O nangunguna ka sa resulta ng eleksyon?

CE: Walang basehan ‘yung nangunguna sa resulta ng eleksyon. Wala pa yatang nag-top na naging senate president in recent history. Ang tanong lang, nasa ‘yo ba ang suporta ng mayorya o hindi? Kung nasa iyo ang suporta ng mayorya, ano mang numero sa eleksyon, ikaw ay magiging senate president.

AC: May nakita ka bang problema bakit hindi mo makuha ‘yung boto?

CE: Hindi ako interesado at hindi ko gusto. Wala akong plano at balakin na balikatin ‘yung ganong uri ng trabaho dahil papapiliin ka palagi kung sinong kakampihan mo, taongbayan o kapwa mo senador? Taongbayan ang bumoto sa ‘yo pero kapwa senador ang magpapanatili sa ‘yo sa pwesto. Sa maraming isyu, magkahiwalay ‘yun.

AC: O ayaw mo lang bumilis ang pagtanda mo?

HS: Bakit n’yo ba gustong maging senador?

CE: Ito ang kinagisnan at ninais kong maging trabaho mula nung ako ay maging abugado, na maging legislator, na manilbihan sa pamahalaan. Natanong na ako n’yan nung akoy unang tumakbong senador at ang nasabi kong sagot ay ito. Ganon pa rin. Hindi ako marunong kumanta, magsayaw o umarte. Pagkatapos kong mamatay, wala akong maiiwang plaka, pellikula o dance step. ‘Di rin ako marunong magsulat ng libro. Wala rin akong maiiwang libro. Pagtatrabaho at paninilbihan sa pamahalaan lang ang alam at kaya kong gawin sa aking paniniwala na sana, may maiwang alaala ‘yung aking nagawa para matapos kong pumanaw, may maka-alalala man lang sa aking… mga nagawa ko, sa aming distrito man o sa probinsya man o sa ating bansa. Hindi ko pangarap maging bayani o magkarebulto. Liliwanangin ko lang, lahat ng may rebulto, binaril at piñata. Wala akong balak mangyari sa akin ‘yun.

On his father’s influence

AC: Anong naging impluwensya sa ‘yo ng father mo na naglingkod during Marcos time na sinusundan mo ngayon. Kasi more on sa agrikultura s’ya. Ikaw ba, meron ka ring ganon o iniwan mo sa kanya ‘yun? Iba ‘yung sa ‘yo.

CE: Veterinarian by profession ang tatay ko. kaya napasok s’ya sa agriculture. Kaya bagay sila ni dating Secretary Ding Panganiban. Dahil si Secretary Panganiban ay sa plants and rice. S’ya naman, sa livestock. Kaya sila palaging partner noon, nagtutulungan. Ang iisang leksyon o aral na nakuha ko sa tatay ko na may kinalaman sa pagtatapos ng term ni Marcos sa EDSA 1 ay hindi habang buhay mong panghahawakan ang anumang pwestong pinanghahawakan mo ngayon. Darating at darating ang panahon na wala ka na sa pwesto. Tiyakin mo na kaya mo pa ring huminga ng normal na hangin at kaya mo pa ring mabuhay ng normal pag wala ka na sa pwesto. Tiyakin mo ‘yung mga nakasalubong papababa na nakasalubong mo nung ikaw ay pataas at paakyat ay nakangiti pa rin sa ‘yo habang ikaw ay papalabas na ng pwesto ng kapangyarihan.

On speaking in Filipino

AC: Saan mo ba hinuhugot yang mga matatalinghaga mong mga sagot?

CE: Sa pelikulang Pilipino.

AC: Talagang mas sanay ka na mag-ganyan ng pagpapaliwanag? Magaling ka rin sa ano, ‘di ba? Kasi nagtuturo ka ng –

CE: Mas kaya kong i-express ‘yung sarili ko sa wikang Pilipino. Pag nag-Iingles ako, may kausap akong ambassador minsan, kailangan ko muna magpainit na tuloy-tuloy na ingles ang lumabas kasi minsan may nahahalo pa ring wikang Pilipino.

On why he should be elected

AC: Sa huling tanong ko, bakit ikaw ang dapat ibotong kandidato sa senado ng ating mamamayan?

CE: Well, sa paniniwala ko, napatunayan ko na at naipakita ko na sa nagdaang anim na taon ang serbisyo na hinahanap at gusto ng ating mamayan bilang tagapaghatid ng boses at boto nila sa senado. Kami’y muling humaharap para ihain ulit ang aming serbisyo at para maipagpatuloy namin ‘yung aming mga nasimulang adhikain, upang sabay-sabay sana nating marating ang mga nais nating marating na pagbabago sa ating bansa.

HS: Ano sa palagay mo ‘yung iyong strengths and weakness bilang isang mambabatas?

CE: Strength at weakness ang aking edad o pagiging bata kumpara sa mga ibang mga mas senior na legislator sa senado o sa House of Representatives man. Weakness dahil mas malawak ang karanasan at kaalaman nila at ‘yung stature nila at mas malakas ang loob nilang gawin ang ilang mga bagay-bagay na kaya pa rin nilang makalusot doon, na kami hindi namin kaya. Subalit strength o kalakasan rin na itinuturing ko ang pagiging bata dahil mas malawak ang aming pananaw sa mga bagay-bagay. Mas bukas ang aming isipan sa pagtanggap ng mga makabagong at bagong paraan kung paano harapin at hanapan ng solusyon ‘yung mga dati nang problema na kinakaharap natin. ‘Pag pinagsama natin ang dunong at karanasan ng mga nakatatanda, at lakas at talento ng mga mas nakababata, siguro ho mas malaki ang tiyansa nating malampasan ang mga hamon na kinakaharap natin ngayon sa ating bansa.

AC: Maraming salamat po, Senador. Mga Kapuso, Senador Francis Joseph “Chiz” Escudero. Kandidato.

-ME/PF, GMA News