Mga proyektong ipinatutupad sa isa sa pinakamahirap na bayan sa bansa, tututukan ng 'Reporter's Notebook'

SILANG PINAKAMAHIRAP
IKALAWANG YUGTO
NGAYONG AUGUST 16, 2018

Ipinanganak na may bukol sa mukha ang dalawampung taong gulang na si Jessica. Minsan na siyang naoperahan sa Maynila pero mula noon, hindi na siya ulit nadala sa ospital. Iniinda niya ngayon ang namamagang tuhod at pananakit ng tiyan. Para mawala ang sakit, luyang dilaw ang ipinanggagamot ng kanyang inang si Aling Judith. Kulang kasi ang pera nilang pambili ng gamot.

Dahil patuloy na idinaraing ni Jessica ang pananakit ng kanyang tuhod na naging dahilan para mahirapan siyang makalakad, sinamahan sila ng Reporter’s Notebook sa ospital. Pero hindi biro ang kailangang daanan papunta rito mula sa Silvino Lubos. Kailangang sumakay ng bangka at dumaan sa ilog. At dahil hindi makalakad, pasan-pasan ni Mang Samuel ang anak. Kasama rin niya papunta sa ospital ang bunsong kapatid na si Jonathan.

Pero natuklasan ng Reporter’s Notebook na may mga proyekto sa Silvino Lubos na hindi natapos at hindi napakikinabangan. Katulad ng isang tulay o timber bridge na malaking pakinabang sana dahil hindi na kailangang dumaan sa ilog ng mga residente. Pero mga poste lang ang nakita namin.

Sa eskuwelahan kung saan nag-aaral si Jonathan, isang silid-aralan ang nakatengga at hindi ginagamit. At maging sa Silvino Lubos Vocational High School, ang dakawang school building na par asana sa mga senior high school student, ilang poste lang ang nakatayo. Ano ang dahilan kung bakit hindi natapos ang mga proyektong ito na makatutulong sana sa mga mahihirap na residente?

Abangan ang ikalawang bahagi ng aming special report, “SILANG PINAKAMAHIRAP” ngayong August 16, 2018, 11:35 pm sa 2018 New York Festivals Bronze World Medalist at 2018 US International Film and Video Festival Silver Screen Awardee--Reporter’s Notebook pagkatapos ng Saksi sa GMA 7.