'Kim Chiu,' itinanghal na 2013 'Super Sireyna Queen Of Queens' ng Eat Bulaga!

Si Francine Garcia o "Kim Chiu" ng Quezon City ang kinoronahan bilang 'Super Sireyna Queen Of Queens,' sa Eat Bulaga nitong Sabado na ginanap sa Resort World Manila.   Hindi rin biro ang mga nagsilbing hurado sa naturang beauty contest na kinabibilangan nina fashion designer Rajo Laurel, Miss Universe 1969 Gloria Diaz at anak niyang si Isabelle Daza, aktor na si Aljur Abrenica at si Michael Carandang, na naging  producer ng sikat na fashion reality show sa US na America’s Next Top Model.   Ang pitong nakalaban ni "Kim Chiu" sa korona ay sina Super Sireyna Queen of Asia, Mariane " Cristine Reyes" Arguelles; Super Sireyna Queen of Tourism, Mae "Marian Rivera" Andrada; Super Sireyna Queen of the World, Michelle "Georgina Wilson" Bermudez; Super Sireyna Queen of the Sky, Maki Eve "Jennylyn Mercado" Mercedez; Super Sireyna Queen of the Ocean, Bembem "Carla Abellana" Radaza; Super Sireyna Queen of the Wind, Aya "Bangs Garcia" Garcia; at Super Sireyna Queen of the Universe, Ava "Heart Evangelista" Santillian.   Nakamit ni "Bangs Garcia" ang special award para sa Best in Talent, habang si "Carla Abellana" ang nag-uwi ng Best in Costume, at Best in Long Gown si "Jennylyn Mercado."   Naging bahagi rin ng pagtatanghal sina Christian Bautista, Aljur Abrenica, Sam Concepcion at Rocco Nacino. Agaw pansin din si Paolo Ballesteros na ginaya ang Hollywood's legendary sexy siren na si Marilyn Monroe.   Bukod sa tinutukan ng mga manonood, pinag-usapan din sa microblogging site na Twitter ang naturang beauty contest matapos mag-trend ang hashtag na #EatBulaga at #SuperSireynaGrandFinals. -- FRJimenez, GMA News