Ryan Agoncillo, sumabak na sa taping ng 'My Husband's Lover'

Sumabak na sa taping ang aktor at TV host na si Ryan Agoncillo para sa guesting nito sa huling linggo ng hit GMA Primetime teleserye na "My Husband's Lover" kung saan mahalaga ang gagampanan nitong karakter sa buhay nina Lally (Carla Abellana), Eric (Dennis Trillo), at Vincent (Tom Rodriguez).

 

"I just hope I get accepted by the followers of My Husband's Lover," wika ni Ryan sa ulat ni Lhar Santiago sa "Chika Minute" ng "24 Oras" nitong Martes.

 

Patuloy pa nito, "I understand that this soap is very popular. Alam mo, sa Facebook wala akong nakikita kundi mga update tungkol sa My Husband's Lover. So, I just hope they appreciate my presence in the soap."

 

Gayundin, bagamat puno ang schedule ni Ryan, ginawan nito ng paraan upang makalabas siya sa naturang teleserye.

 

"It's one of the most groundbrekaing soaps of late, no? Kumbaga, makasabit man lang kahit sa huli para masabing I was part of that soap," pahayag ng aktor.

 

Samantala, ayaw naman ibunyag ni Ryan ang kanyang karakter sa palabas. Aniya, "Mga beh, sana ay magustuhan niyo ang aking pakiki-beh sa final week ng My Husband's Lover and mga Kapuso, I'm hoping to see you guys very soon."

 

Ngayong Biyernes, Oktubre 18, ang pagtatapos ng "My Husband's Lover." Mapapanood ito sa GMA Telebabad. — Mac Macapendeg/RSJ, GMA News