Tom Rodriguez, Luis Gabriel Moreno to get stars at Eastwood Walk of Fame

Kabilang sa 23 personalidad sa loob at labas ng showbiz na mabibigyan ng bituin sa Walk of Fame sa Eastwood, Quezon City sa darating na Diyembre ang Kapuso actor na si Tom Rodriguez at ang kauna-unahang Pinoy gold medalist sa nagdaang 2014 Youth Olympics na si Luis Gabriel Moreno.

 

Nag-uwi ng 16-year-old archer ang gintong medalya sa mixed international team archery event mula sa 2014 Summer Youth Olympic noong Agosto sa China.

 

Si Tom Rodriguez naman ang isa sa mga pinakakilalang Kapuso actor ngayon matapos bumida sa internationally-acclaimed series na My Husband's Lover kasama si Dennis Trillo. 

 

Napanood rin si Tom sa GMA primetime series na My Destiny kasama si Carla Abellana, at kasalukuyan siyang host sa game show na Don't Lose the Money ng GMA. Mapapanood rin si Tom sa MMFF 2014 entry na Praybeyt Benjamin 2 sa darating na Disyembre.

 

Ayon kay Master Showman German Moreno, ang punong-abala sa pagpili ng mga magagawaran ng bituin sa Walk of Fame, pinili ang mga personalidad base sa kasikatan nila at sa mga naiambag nila sa Pilipinas at sa kani-kanilang larangan.

 

Bukod kay Tom at Luis, kabilang rin sa mga mabibigyan ng bituin ang Kapuso artists na sina Allan K at Queen of Soul Jaya. 

 

Nasa listahan rin sina Direk Joey Lamangan, mga beteranong aktor na si Daisy Romualdez, Lito Legaspi, Angelito Nepomuceno, Chanda Romero, Dante Rivero, at Tony Ferrer, ballet dancer na si Liza Macuja-Elizalde, hosts na sina Willie Revillame, Cory Quirino, at Vice Ganda, at ang mga aktor at aktres na sina Aiko Melendez, Angel Aquino, Sylvia Sanchez, Kathryn Bernardo, Daniel Padilla, Carmi Martin, Jestoni Alarcon, at Evangeline Pascual. 

 

Gaganapin ang pagawad ng bituin sa December 1 sa Eastwood, Quezon City.

 

Itinatag ang Eastwood Walk of Fame noong December 1, 2005 alinsunod sa Hollywood Walk of Fame sa Amerika. Nasundan ito ng pagkakatatag ng Kapuso Walk of Fame sa paligid ng GMA Network Center sa Timog, Quezon City noong March 23, 2014 sa pangunguna ni Kuya Germs. — Bianca Rose Dabu/JST, GMA News