Donita at Eric, naisalba ang pagsasama pero may kailangan pa silang lutasin

Matapos aminin ni Donita Rose ilang buwan na ang nakalilipas na dumadaan sa pagsubok ang pagsasama nila ng mister na si Eric Villarama, inihayag ngayon ng Kapuso TV host-actress na nalampasan na nilang mag-asawa ang naturang suliranin.

Sa Startalk episode nitong Sabado, August 15, sinabi ni Donita na hindi na natuloy ang pagpirma sana niya sa divorce paper nila ni Eric na naka-base pa rin sa Amerika.

"'Yung prayer ko kay Lord, 'Lord sa-signnan [sign] ko na ang papers talaga kung hindi siya tumino. And then I asked God to give me one answer. I said, 'Eric, you have to talk to our pastor first. Kapag nagpaalam ka na, I'll sign the papers on our anniversary June 9," kuwento ni Donita.
 
Patuloy niya, "June 6 yata nakausap niya. And then I think June 7 he called me and said, 'I don't know what was going through my mind. Why would we sign divorce papers? This is so stupid.'"



Pero aminado rin si Donita na may kasalanan din siya kung bakit lumala ang hidwaan nila noon ng asawa.

"Before, lagi kaming nag-aaway and lagi kaming nagkakaroon ng miscommunication especially with the distance between us. Nag-build-up na yung galit namin sa isa't isa," ani Donita.

"Hanggang sa we both realized that we almost lost each other, and at the end of the day, I still love him. I realized that if I love someone with all my heart, I need to humble myself," ayon sa aktres.

Nakapanayam din ng Startalk sa pamamagitan ng telepono si Eric, na kasalukuyang nasa California, USA.

"We have a lot of differences. In marriage, you always have differences but I think it's all about communication. That's what is most important," ani Eric.

Sinabi nito na lagi silang nagtatawagan ni Donita at lagi rin niyang kinakausap ang anak nila na si JP.

Mensahe niya tungkol kay Donita, "I want to say that I'm so proud of her for how far she has gone. She's very great at what she does. I couldn't ask for a better wife or life partner with her, she's the best."

Pero pag-amin ni Donita, may problema pa sila ng asawa na dapat lutasin at ito ay kung sino ang magsasakripisyo ng trabaho para mabuo na ang kanilang pamilya. -- FRJ, GMA News