Songwriting contest, bubuksan ng Eat Bulaga dahil sa mga 'Aldub' inspired song

Dahil sa dumaraming awitin na nalikha na inspirasyon sa tambalang "AlDub" nina Alden Richards at Maine "Yaya Dub" Mendoza, inanunsiyo ni Joey de Leon nitong Sabado na magkakaroon ng songwriting contest ang Eat Bulaga.

Pahayag ni Joey bago matapos ang programa ng Eat Bulaga nitong Sabado, "Hindi lang ang kulturang Filipino ang binubuhay at ibinabalik ng "AlDub," pati na rin ang mga OPM  (Original Pilipino Music). Kaya para sa lahat ng dabarkds na gustong makapagsulat ng kanta, ng awitin na nabigyan ng inspirasyon ng AlDub, ito na ang pagkakataon n'yo."

Dagdag pa ng Henyo Master ng Eat Bulaga, bukas ang naturang contest sa lahat ng dabarkds na gustong sumali  at iaanunsyo rin nila sa mga darating na araw ang detalye kung papaano sumali.

Sa pagdiriwang ng "National Pabebe Wave Day" nitong Sabado, ilang "AlDub" songs ang ipinarinig sa Eat Bulaga habang naghahanda si Alden sa gagawing pagbisita niya kay Yaya Dub sa mansyon ni Lola Nidora.
 

Bago nito, ilang mang-aawit na gumawa ng AlDub inspired songs ang napanood na sa GMA News Unang Hirit.








-- FRJ, GMA News